ଜରିପାଲ ତଳେ ଚାଲିଛି ସାରଙ୍ଗଡ ରାଜସ୍ୱ ନିରୀକ୍ଷକ କାର୍ଯ୍ୟାଳୟ, ପ୍ରଶାସନ ଦୃଷ୍ଟି ଦେବାକୁ ଦାବି…..
କନ୍ଧମାଳ : (ରିପୋର୍ଟ କୁନା ଦିଗାଲ )କନ୍ଧମାଳ ଜିଲ୍ଲାର କ.ନୂଆଗାଁ ବ୍ଲକ ଅନ୍ତର୍ଗତ ସାରଙ୍ଗଡ ପଞ୍ଚାୟତର ରାଜସ୍ୱ ନିରୀକ୍ଷକ ( ଆର୍ ଆଇ) କାର୍ଯ୍ୟାଳୟର ବିକଳ ଚିତ୍ର ଏବେ ସାମ୍ନାକୁ ଆସିଛି। ବର୍ଷା ଋତୁରେ କାର୍ଯ୍ୟାଳୟର ଛାତରୁ ପାଣି ଗଳୁଥିବାରୁ ଜରିପାଲ ଘୋଡ଼ାଇ କାର୍ଯ୍ୟାଳୟ କାର୍ଯ୍ୟ ଚାଲୁଥିବା ଦେଖିବାକୁ ମିଳିଛି।
ସୂଚନା ଅନୁଯାୟୀ, ଏହି ରାଜସ୍ୱ ନିରୀକ୍ଷକ କାର୍ଯ୍ୟାଳୟଟି ବହୁ ବର୍ଷ ପୂର୍ବେ ନିର୍ମାଣ ହୋଇଥିଲା। ଦୀର୍ଘଦିନ ଧରି ଆବଶ୍ୟକ ମରାମତି ଅଭାବରୁ କୋଠାଟି ଧୀରେ ଧୀରେ ଦୁର୍ବଳ ହେବା ସହ ଛାତରୁ ବର୍ଷାଜଳ ଗଳୁଛି। ଲଗାଣ ବର୍ଷା ହେଲେ କାର୍ଯ୍ୟାଳୟ ଭିତରେ ପାଣି ପଶିବାରୁ ଗୁରୁତ୍ୱପୂର୍ଣ୍ଣ ସରକାରୀ ଦସ୍ତାବିଜ ଓ ଅନ୍ୟାନ୍ୟ କାଗଜପତ୍ର ନଷ୍ଟ ହେବାର ଆଶଙ୍କା ରହିଛି।
ଏଭଳି ପରିସ୍ଥିତିରେ କାର୍ଯ୍ୟରତ ଅଧିକାରୀ, କର୍ମଚାରୀଙ୍କ ସମେତ ବିଭିନ୍ନ ରାଜସ୍ୱ କାର୍ଯ୍ୟ ପାଇଁ ଆସୁଥିବା ଜନସାଧାରଣ ମଧ୍ୟ ନିଜକୁ ସୁରକ୍ଷିତ ମଣୁନଥିବା ଅଭିଯୋଗ ହୋଇଛି। ଏପରି ଅବ୍ୟବସ୍ଥିତ ପରିବେଶରେ ସରକାରୀ କାର୍ଯ୍ୟ ସମ୍ପାଦନ ହେବା ନେଇ ମଧ୍ୟ ପ୍ରଶ୍ନ ଉଠିଛି।
ତେଣୁ ପ୍ରଶାସନ ତୁରନ୍ତ ଏହି କାର୍ଯ୍ୟାଳୟର ସ୍ଥିତି ଅନୁଧ୍ୟାନ କରି ଆବଶ୍ୟକ ମରାମତି କରିବା ସହ ଆବଶ୍ୟକ ହେଲେ ଏକ ନୂତନ କାର୍ଯ୍ୟାଳୟ କୋଠା ନିର୍ମାଣ କରିବାକୁ ଅଞ୍ଚଳବାସୀ ଦାବି କରିଛନ୍ତି। ଏହାଦ୍ୱାରା ରାଜସ୍ୱ ବିଭାଗର କାର୍ଯ୍ୟ ସୁବ୍ୟବସ୍ଥିତ ହେବା ସହ ଅଧିକାରୀ ଓ ଜନସାଧାରଣଙ୍କ ସୁରକ୍ଷା ମଧ୍ୟ ନିଶ୍ଚିତ ହୋଇପାରିବ।
