*ଗୋଷାଣୀ ବ୍ଲକର ବିଭିନ୍ନ ଗ୍ରାମ ପରିଦର୍ଶନ କଲେ ବିଧାୟକ ରୂପେଶ ପାଣିଗ୍ରାହୀ* ।
ଗଜପତି,୨୮.୧୦(ମନୋଜ କୁମାର ପାଢୀଙ୍କ ରିପୋର୍ଟ):-ଗଜପତି ଜିଲ୍ଲାରେ ବାତ୍ୟାଜନିତ ପରିସ୍ଥିତିକୁ ନେଇ ଜନସାଧାରଣଙ୍କ ମଧ୍ୟରେ ଭୟ ଓ ଆଶଙ୍କା ଲାଗି ରହିଥିବା ବେଳେ ଗୋଷାଣୀ ବ୍ଲକର ବିଭିନ୍ନ ଗ୍ରାମ ପରିଦର୍ଶନ କରି ଲୋକଙ୍କ ସମସ୍ୟା ଓ ଅଭାବ ଅସୁବିଧା ବୁଝିଛନ୍ତି ପାରଳାଖେମୁଣ୍ଡି ବିଧାୟକ ରୂପେଶ କୁମାର ପାଣିଗ୍ରାହୀ। ବାତ୍ୟା ଓ ପ୍ରବଳ ବର୍ଷା ସମୟରେ ଗ୍ରାମାଞ୍ଚଳର ଲୋକମାନେ କିପରି ସୁରକ୍ଷିତ ରହିବେ ଏବଂ ସେମାନଙ୍କୁ ଆବଶ୍ୟକ ସହାୟତା କିପରି ମିଳିପାରିବ, ସେଥିପ୍ରତି ଗୁରୁତ୍ୱ ଦେଇ ବିଧାୟକ ବିଭିନ୍ନ ଅଞ୍ଚଳର ସ୍ଥିତି ଅନୁଧ୍ୟାନ କରିଛନ୍ତି।ଏହି ଗସ୍ତ ସମୟରେ ବିଧାୟକ ଗୋଷାଣୀ ବ୍ଲକ ଅନ୍ତର୍ଗତ ଆଙ୍କୁଡୁ ଗ୍ରାମର ହରିଜନ ସାହି ସମେତ ଦେଉଳା, ରଣଦେବୀ, ଉପଲଡ଼ା, କତଲକଇଠା, ବଡ଼ ଗୋଷାଣୀ ଓ ଲିଙ୍ଗିପୁର ଆଦି ଗ୍ରାମରେ ପହଞ୍ଚି ସ୍ଥାନୀୟ ବାସିନ୍ଦାଙ୍କ ସହ ଆଲୋଚନା କରିଥିଲେ।
ବାତ୍ୟାକୁ ନେଇ ଲୋକମାନେ କେଉଁ କେଉଁ ସମସ୍ୟାର ସମ୍ମୁଖୀନ ହେଉଛନ୍ତି, ଘରଦ୍ୱାରର ସୁରକ୍ଷା କିପରି ରହିଛି ଏବଂ ପ୍ରବଳ ବର୍ଷା ଓ ପବନ ଯୋଗୁଁ କୌଣସି ଅସୁବିଧା ସୃଷ୍ଟି ହୋଇଛି କି ନାହିଁ, ସେ ସମ୍ପର୍କରେ ପଚାରି ବୁଝିଥିଲେ।ବିପଦ ସମୟରେ ଜନସାଧାରଣଙ୍କ ନିକଟରେ ପହଞ୍ଚି ସେମାନଙ୍କ ଗୁହାରି ଶୁଣିବା ସହ ସମସ୍ୟାର ସମାଧାନ ପାଇଁ ଆବଶ୍ୟକ ପଦକ୍ଷେପ ନେବା ଉପରେ ବିଧାୟକ ଗୁରୁତ୍ୱ ଦେଇଥିଲେ। ବାତ୍ୟା ପରିସ୍ଥିତିରେ ଲୋକଙ୍କ ସୁରକ୍ଷା ସର୍ବାଧିକ ଗୁରୁତ୍ୱପୂର୍ଣ୍ଣ ହୋଇଥିବାରୁ ସମସ୍ତେ ସତର୍କ ରହିବା ସହ ପ୍ରଶାସନ ପକ୍ଷରୁ ଜାରି ନିର୍ଦ୍ଦେଶାବଳୀ ପାଳନ କରିବା ଆବଶ୍ୟକ ବୋଲି ଦର୍ଶାଇଥିଲେ।ବିଶେଷକରି ଗ୍ରାମାଞ୍ଚଳରେ ରହୁଥିବା ଗରିବ, ଅସହାୟ ଓ ଅସୁରକ୍ଷିତ ପରିବାରଙ୍କ ପାଇଁ ବାତ୍ୟା ସମୟରେ ଅଧିକ ଆହ୍ୱାନପୂର୍ଣ୍ଣ ହୋଇଥାଏ। ମାଟି ଘରେ ରହୁଥିବା ପରିବାର, ବୟସ୍କ ବ୍ୟକ୍ତି, ଶିଶୁ, ମହିଳା, ଗର୍ଭବତୀ ଓ ଅସୁସ୍ଥ ବ୍ୟକ୍ତିଙ୍କ ସୁରକ୍ଷା ପ୍ରତି ସ୍ୱତନ୍ତ୍ର ଧ୍ୟାନ ଦେବା ଆବଶ୍ୟକ।
ଏଭଳି ପରିସ୍ଥିତିରେ ଲୋକଙ୍କ ନିକଟରେ ପହଞ୍ଚି ସେମାନଙ୍କ ଅସୁବିଧା ବୁଝିବା ଏବଂ ଆବଶ୍ୟକ ସହାୟତା ଯୋଗାଇ ଦେବା ଅତ୍ୟନ୍ତ ଜରୁରୀ।ବାତ୍ୟା ଓ ପ୍ରବଳ ବର୍ଷା ସମୟରେ ଅସୁରକ୍ଷିତ ଘରେ ରହୁଥିବା ଲୋକମାନେ ନିକଟସ୍ଥ ନିରାପଦ ଆଶ୍ରୟସ୍ଥଳୀକୁ ଯିବା, ପିଇବା ପାଣି ଓ ଶୁଖିଲା ଖାଦ୍ୟ ଭଳି ଜରୁରୀ ସାମଗ୍ରୀ ପ୍ରସ୍ତୁତ ରଖିବା ସହ ଜରୁରୀ ପରିସ୍ଥିତିରେ ସମ୍ପୃକ୍ତ ଅଧିକାରୀଙ୍କ ସହ ଯୋଗାଯୋଗ କରିବା ଆବଶ୍ୟକ ବୋଲି ପରାମର୍ଶ ଦେଇଥିଲେ।ବିଧାୟକଙ୍କ ଏହି ଗ୍ରାମ ପରିଦର୍ଶନକୁ ବାତ୍ୟା ସମୟରେ ଜନସାଧାରଣଙ୍କ ସମସ୍ୟା ବୁଝିବା ଏବଂ ସେମାନଙ୍କ ପାଖରେ ରହିବାର ଏକ ପ୍ରୟାସ ଭାବେ ଦେଖାଯାଉଛି। ବିଧାୟକଙ୍କ ଏହି ଗସ୍ତ ସମୟରେ ଗୋଷାଣୀ ବ୍ଲକ ଅଧ୍ୟକ୍ଷ ଏନ୍. ବୀରରାଜୁ, ଜିଲ୍ଲା ପରିଷଦ ସଦସ୍ୟ ଏସ୍. ବାଲାରାଜୁ, ନିର ଭୂୟାଁ, ଏମ୍. କ୍ରିଷ୍ଣା ଓ ଉମା ରେଡ୍ଡୀଙ୍କ ସମେତ ଅନ୍ୟମାନେ ଉପସ୍ଥିତ ଥିଲେ।
