ଲଣ୍ଡନ,୨୦।୭: ଲଣ୍ଡନର ଇସ୍କନ ପରିଚାଳିତ ଗୋବିନ୍ଦା ରେସ୍ଟୁରାନ୍ଟ, ଯାହା ଏକ ଶାଖାହାରୀ ପ୍ରତିଷ୍ଠାନ ଭାବେ ପରିଚିତ, ସେଠାରେ ଜଣେ ଯୁବକଙ୍କ ଦ୍ୱାରা KFC ଚିକେନ ଖାଇବା ଘଟଣା ସୋସିଆଲ ମିଡିଆରେ ଭାଇରାଲ ହୋଇ ବିଶ୍ୱବ୍ୟାପୀ ତୀବ୍ର ବିବାଦ ସୃଷ୍ଟି କରିଛି।ଭାଇରାଲ ହୋଇଥିବା ଏକ ଭିଡିଓରେ ଦେଖାଯାଇଛି ଯେ, ଜଣେ ଆଫ୍ରିକୀୟ-ବ୍ରିଟିଶ ବ୍ୟକ୍ତି ଗୋବିନ୍ଦା ରେସ୍ଟୁରାନ୍ଟରେ ପ୍ରବେଶ କରି କର୍ମଚାରୀଙ୍କୁ ମାଂସ ଖାଦ୍ୟ ମିଳୁଛି କି ନାହିଁ ବୋଲି ପଚାରିଛନ୍ତି। କର୍ମଚାରୀ ଜଣେ ଜଣାଇଛନ୍ତି ଯେ, ଏଠାରେ ମାଂସ, ପିଆଜ କିମ୍ବା ରସୁଣ ମିଳେ ନାହିଁ। ଏହା ପରେ, ସେ ଏକ KFC ଚିକେନ ବକ୍ସ ବାହାର କରି ରେସ୍ଟୁରାନ୍ଟ ଭିତରେ ଖାଇବା ଆରମ୍ଭ କରିଥିଲେ ଏବଂ ଅନ୍ୟ ଗ୍ରାହକ ଓ କର୍ମଚାରୀଙ୍କୁ ମାଂସ ଖାଇବାକୁ ଅଫର କରିଥିଲେ।ଭିଡିଓରେ ଜଣେ ଗ୍ରାହକ ତାଙ୍କୁ ବାଧା ଦେଇ କହିଛନ୍ତି, “ଆପଣ ଏହି ସ୍ଥାନର ନିୟମ ଉଲ୍ଲଙ୍ଘନ କରୁଛନ୍ତି, ଏହା ଉଚିତ ନୁହେଁ।” ତଥାପି, ସେ ତାଙ୍କର ଅସୌଜନ୍ୟମୂଳକ ବ୍ୟବହାର ଜାରି ରଖିଥିଲେ। ପରେ ସୁରକ୍ଷା କର୍ମୀଙ୍କୁ ଡକାଯାଇ ତାଙ୍କୁ ରେସ୍ଟୁରାନ୍ଟରୁ ବାହାର କରାଯାଇଥିଲା।
ଏହି ଘଟଣା ସୋସିଆଲ ମିଡିଆରେ ତୀବ୍ର ପ୍ରତିକ୍ରିୟା ସୃଷ୍ଟି କରିଛି। ଅନେକେ ଏହାକୁ ଜାତିଗତ ବା ଧାର୍ମିକ ଅସହିଷ୍ଣୁତା ସହ ଜଡ଼ିତ ବୋଲି ପ୍ରଶ୍ନ ଉଠାଇଛନ୍ତି। ଜଣେ ବ୍ୟବହାରକାରୀ ଏକ୍ସରେ ଲେଖିଛନ୍ତି, “ସ୍ଥାନୀୟ ପୋଲିସ ଷ୍ଟେସନରେ ଅଭିଯୋଗ ଦାୟର ହେବା ଉଚିତ। ଏହା ହିନ୍ଦୁମାନଙ୍କ ପ୍ରତି ସ୍ପଷ୍ଟ ବିଦ୍ୱେଷ। ହିନ୍ଦୁମାନେ ପ୍ରତିଶୋଧ ନେବେ ନାହିଁ ବୋଲି ଜାଣି ସେ ଏପରି କରିବାକୁ ସାହସ କରିଛନ୍ତି।”ଅନ୍ୟ ଜଣେ ବ୍ୟବହାରକାରୀ ଲେଖିଛନ୍ତି, “ଯେକୌଣସି ରେସ୍ଟୁରାନ୍ଟରେ ବାହାରୁ ଖାଦ୍ୟ ଆଣିବା ନିଷିଦ୍ଧ। ଇସ୍କନରେ ମାଂସ ଆଣିବା କେବଳ ଅସମ୍ମାନ ନୁହେଁ, ଏହା ଆମର ମୂଲ୍ୟବୋଧ ଉପରେ ଆକ୍ରମଣ। ଏହାର ପବିତ୍ରତା ରକ୍ଷା ପାଇଁ କାର୍ଯ୍ୟାନୁଷ୍ଠାନ ଆବଶ୍ୟକ।”ଆଉ ଜଣେ ମନ୍ତବ୍ୟ କରିଛନ୍ତି, “ଏପରି ସାଂସ୍କୃତିକ ଓ ଧାର୍ମିକ ମାନ୍ୟତାର ଇଚ୍ଛାକୃତ ଉଲ୍ଲଙ୍ଘନ ଏକ ସଭ୍ୟ ସମାଜରେ ସହ୍ୟ କରାଯାଇ ପାରିବ ନାହିଁ।”ଗୋବିନ୍ଦା ରେସ୍ଟୁରାନ୍ଟ ହିନ୍ଦୁ ଧର୍ମର ମୂଲ୍ୟବୋଧ ଅନୁଯାୟୀ କେବଳ ଶାଖାହାରୀ ଖାଦ୍ୟ ପରିବେଷଣ କରେ, ଯେଉଁଥିରେ ମାଂସ, ପିଆଜ କିମ୍ବା ରସୁଣ ବ୍ୟବହାର ହୁଏ ନାହିଁ। ଇସ୍କନ ନିୟମ ଅନୁଯାୟୀ, ମାଂସ ଖାଦ୍ୟ ଶାରୀରିକ, ମାନସିକ ଓ ଆଧ୍ୟାତ୍ମିକ ସ୍ତରରେ କ୍ଷତିକାରକ ବୋଲି ବିବେଚିତ ହୁଏ। ଏହି ଘଟଣାକୁ ଅନେକେ ଧାର୍ମିକ ସ୍ଥାନରେ ଅପବିତ୍ରତା ସୃଷ୍ଟି କରିବାର ଏକ ଇଚ୍ଛାକୃତ ପ୍ରୟାସ ବୋଲି ଅଭିହିତ କରିଛନ୍ତି।ଏହି ଭିଡିଓର ସତ୍ୟତା, ସ୍ଥାନ କିମ୍ବା ତାରିଖ ସମ୍ପର୍କରେ ସ୍ପଷ୍ଟ ତଥ୍ୟ ମିଳିନାହିଁ। ଲଣ୍ଡନର ଇସ୍କନ ଶାଖା ଏପର୍ଯ୍ୟନ୍ତ ଏ ସମ୍ପର୍କରେ କୌଣସି ଆନୁଷ୍ଠାନିକ ବିବୃତି ଜାରି କରିନାହିଁ। ତଥାପି, ଏହି ଘଟଣା ସାଂସ୍କୃତିକ ସମ୍ବେଦନଶୀଳତା, ଧାର୍ମିକ ସମ୍ମାନ ଏବଂ ବିବିଧ ସମାଜରେ ପାରସ୍ପରିକ ବୁଝାମଣାର ଆବଶ୍ୟକତା ଉପରେ ଚାଲୁଥିବା ବିତର୍କକୁ ଆହୁରି ଉଜାଗର କରିଛି।