ଓଡ଼ିଶାରେ ଭବ୍ୟ ସ୍ୱାଗତ ପାଉଛି ‘ଶ୍ରୀରାମ ସ୍ୱର୍ଣ୍ଣ ଧନୁ ରଥ ଯାତ୍ରା’, ୨୨ ଜାନୁଆରୀରେ ଅୟୋଧ୍ୟାରେ ପହଞ୍ଚିବ
ଦାମନଯୋଡି: ରାଉରକେଲାରୁ ଅୟୋଧ୍ୟା ଦିଗକୁ ଆରମ୍ଭ ହୋଇଥିବା ଭଗବାନ ଶ୍ରୀରାମଙ୍କ ପବିତ୍ର ‘ସ୍ୱର୍ଣ୍ଣ ଧନୁ’ (ଗୋଲ୍ଡେନ୍ ବୋ) ବହନକାରୀ ‘ଶ୍ରୀରାମ ସ୍ୱର୍ଣ୍ଣ ଧନୁ ରଥ’ ଯାତ୍ରାକୁ ସାରା ଓଡ଼ିଶାରେ ଭକ୍ତିମୟ ଓ ଭବ୍ୟ ସ୍ୱାଗତ ମିଳୁଛି। ରାଉରକେଲା ସହରର ହନୁମାନ ବାଟିକାରୁ ୨ ଜାନୁଆରୀରେ ଏହି ପବିତ୍ର ଯାତ୍ରାର ଶୁଭାରମ୍ଭ ହୋଇଥିଲା।ଗାଁରୁ ଗାଁକୁ ଯାଉଥିବା ଏହି ରଥକୁ ଭକ୍ତମାନେ ଭଜନ, ଧୋଳ, ବାଜା ଓ ପାରମ୍ପରିକ ନୃତ୍ୟ-ଗୀତ ସହିତ ସ୍ୱାଗତ କରୁଛନ୍ତି, ଯାହା ସମଗ୍ର ଯାତ୍ରା ପଥକୁ ଭକ୍ତି ଓ ଉତ୍ସବରେ ପରିଣତ କରିଛି।
ନବରଙ୍ଗପୁର, ମାଲକାନଗିରି, ଜୟପୁର, କୋରାପୁଟ, ସୁନାବେଦା ଓ ସେମିଳିଗୁଡା ମାର୍ଗ ଦେଇ ଯାତ୍ରା କରୁଥିବା ସମୟରେ ହଜାର ହଜାର ଭକ୍ତ ଦର୍ଶନ ଓ ପୂଜାର୍ଚ୍ଚନା ପାଇଁ ଏକତ୍ରିତ ହୋଇଥିଲେ।ଦାମନଯୋଡି ଏହି ଯାତ୍ରାର ଏକ ବିଶେଷ ଆକର୍ଷଣ ଦେଖିବାକୁ ମିଳିଥିଲା। ଦୀପକ ବାବୁ ଓ ଅମିତ ବାବୁଙ୍କ ଆୟୋଜନରେ ରଥକୁ ଭବ୍ୟ ସ୍ୱାଗତ ଦିଆଯାଇଥିଲା, ଯେଉଁଠାରେ ଶତାଧିକ ଭକ୍ତ ଉତ୍ସବରେ ସାମିଲ ହୋଇଥିଲେ।
ପରେ ପାରମ୍ପରିକ ରୀତିରୀବାଜ ଅନୁସାରେ ରଥକୁ କାକ୍ରିଗୁମା ଦିଗରେ ପ୍ରେରଣ କରାଯାଇଥିଲା।ଯାତ୍ରା ପଥରେ ଏହି ସ୍ୱର୍ଣ୍ଣ ଧନୁଷ ୧୯ ଜାନୁଆରୀରେ ପୁରୀର ପବିତ୍ର ଜଗନ୍ନାଥ ଧାମରେ ବିଶ୍ରାମ କରିବ। ପରେ ୨୨ ଜାନୁଆରୀରେ ଉତ୍ତର ପ୍ରଦେଶର ଅୟୋଧ୍ୟାକୁ ପହଞ୍ଚି, ଶ୍ରୀରାମ ମନ୍ଦିରରେ ଭଗବାନ ଶ୍ରୀରାମଙ୍କୁ ଏହି ପବିତ୍ର ସ୍ୱର୍ଣ୍ଣ ଧନୁଷକୁ ଭେଟି ଦିଆଯିବ।‘ସ୍ୱର୍ଣ୍ଣ ଧନୁ ରଥ ଯାତ୍ରା’ ଭକ୍ତି, ସଂସ୍କୃତି ଓ ଆସ୍ଥା ମାଧ୍ୟମରେ ଲୋକମାନଙ୍କ ହୃଦୟ ଓ ସମୁଦାୟକୁ ଯୋଡ଼ିବାର ଏକ ଆଧ୍ୟାତ୍ମିକ ପ୍ରତୀକ ଭାବେ ପରିଚିତ ହେଉଛ!
ରିପୋର୍ଟ: ଚନ୍ଦନ ପ୍ରସାଦ
