ବାହୁଡ଼ା ଯାତ୍ରାରେ ସେବାର ଅନନ୍ୟ ଦୃଷ୍ଟାନ୍ତ, ଭକ୍ତଙ୍କୁ ଖାଦ୍ୟ, ପାନୀୟ ଓ ପ୍ରାଥମିକ ଚିକିତ୍ସା ସହାୟତା
ବଲାଙ୍ଗିର, ୨୪ ଜୁଲାଇ: ପବିତ୍ର ବାହୁଡ଼ା ଯାତ୍ରା ଅବସରରେ ସହଯୋଗ ଫାଉଣ୍ଡେସନ, ମାରୱାଡ଼ି ମହିଳା ସମିତି ଓ ଲାୟନ୍ସ କ୍ଲବ ବଲାଙ୍ଗିରର ମିଳିତ ଉଦ୍ୟମରେ ଭକ୍ତମାନଙ୍କ ପାଇଁ ଏକ ସେବା କାର୍ଯ୍ୟକ୍ରମ ଆୟୋଜିତ ହୋଇଥିଲା।ଏହି ଅବସରରେ ଶ୍ରଦ୍ଧାଳୁମାନଙ୍କୁ ବୁନ୍ଦି, ବିଶୁଦ୍ଧ ପାନୀୟ ଜଳ ଓ ଓଆରଏସ୍ ପାନୀୟ ବଣ୍ଟନ କରାଯାଇଥିଲା। ସେହିପରି ଆବଶ୍ୟକତା ଥିବା ଲୋକମାନଙ୍କୁ ନୂତନ ବସ୍ତ୍ର ମଧ୍ୟ ପ୍ରଦାନ କରାଯାଇଥିଲା।ଭକ୍ତମାନଙ୍କ ସ୍ୱାସ୍ଥ୍ୟ ଓ ସୁରକ୍ଷାକୁ ଦୃଷ୍ଟିରେ ରଖି ପ୍ରାଥମିକ ଚିକିତ୍ସା ସେବାର ବ୍ୟବସ୍ଥା କରାଯାଇଥିବା ବେଳେ, ଜରୁରୀ ସହାୟତା ପାଇଁ ସ୍ୱେଚ୍ଛାସେବୀମାନେ ସକ୍ରିୟ ଭାବେ ନିୟୋଜିତ ରହିଥିଲେ।ଏହି ସେବା କାର୍ଯ୍ୟକ୍ରମ ବାହୁଡ଼ା ଯାତ୍ରାର ଆଧ୍ୟାତ୍ମିକ ପରିବେଶକୁ ଅଧିକ ଗୌରବମୟ କରିବା ସହ ସେବା, ସହଯୋଗ, କରୁଣା ଓ ସାମାଜିକ ଦାୟିତ୍ୱବୋଧର ସନ୍ଦେଶ ପ୍ରଦାନ କରିଥିଲା। ଆୟୋଜକମାନେ ମହାପ୍ରଭୁ ଶ୍ରୀଜଗନ୍ନାଥଙ୍କ ନିକଟରେ ସମସ୍ତଙ୍କ ସୁଖ, ଶାନ୍ତି, ସୁସ୍ଥତା ଓ ସମୃଦ୍ଧି କାମନା କରିଥିଲେ।
