ପୁଅର ମରଶରୀର ଗାଁକୁ ଆଣିବାକୁ ବିଲ ବନ୍ଧକ ରଖିଲେ ବୃଦ୍ଧ ବାପା; ପରିବାରକୁ ସରକାରୀ ସହାୟତା ପାଇଁ ସ୍ଵାକ୍ ର ପ୍ରୟାସ

ପୁଅର ମରଶରୀର ଗାଁକୁ ଆଣିବାକୁ ବିଲ ବନ୍ଧକ ରଖିଲେ ବୃଦ୍ଧ ବାପା; ପରିବାରକୁ ସରକାରୀ ସହାୟତା ପାଇଁ ସ୍ଵାକ୍ ର ପ୍ରୟାସଘୁ. ଉଦୟଗିରି :- ୨୬ ଅକ୍ଟୋବର: (ରିପୋର୍ଟ କୁନା ଦିଗାଲ )ବିବାହ ପାଇଁ ନିର୍ବନ୍ଧ ସରିଥିଲା। ନୂଆ ଘର ତିଆରି କରି ଜୀବନସାଥୀଙ୍କ ସହ ସୁଖର ସଂସାର ଗଢ଼ିବାକୁ ଦେଖିଥିଲେ ଅନେକ ସ୍ୱପ୍ନ। ସେହି ସ୍ୱପ୍ନକୁ ସାକାର କରିବା ପାଇଁ ରୋଜଗାର ଆଶାରେ ଚେନ୍ନାଇ ଯାଇଥିଲେ। ହେଲେ ଭାଗ୍ୟର ବିଡ଼ମ୍ବନା! ବିବାହ କରି ନୂଆ ଜୀବନ ଆରମ୍ଭ କରିବା ପୂର୍ବରୁ ହିଁ ଲିଭିଗଲା ତାଙ୍କ ଜୀବନଦୀପ। ଯେଉଁ ପୁଅକୁ ନେଇ ବୃଦ୍ଧ ବାପା ଅନେକ ସ୍ୱପ୍ନ ଦେଖିଥିଲେ, ସେହି ପୁଅର ମରଶରୀରକୁ ଗାଁକୁ ଫେରାଇ ଆଣିବା ପାଇଁ ଶେଷରେ ନିଜ ବିଲ ବନ୍ଧକ ରଖିବାକୁ ପଡ଼ିଲା। ଏହା କେବଳ ଗୋଟିଏ ପରିବାରର ଦୁଃଖ ନୁହେଁ, ବରଂ ଦାଦନ ଶ୍ରମିକଙ୍କ ଜୀବନର ଅନିଶ୍ଚିତତା ଓ ଗରିବ ପରିବାରର ଅସହାୟତାର ଏକ ହୃଦୟବିଦାରକ ଚିତ୍ର।ଏଭଳି ଏକ ଦୁଃଖଦ ଘଟଣା କନ୍ଧମାଳ ଜିଲ୍ଲା ଘୁ.ଉଦୟଗିରି ବ୍ଲକ ଅନ୍ତର୍ଗତ ରାଇକଲା ପଞ୍ଚାୟତର ମାଦିନାଯୁ ଗ୍ରାମରେ ଶୋକର ଛାୟା ଖେଳାଇ ଦେଇଛି।ନିର୍ବନ୍ଧ ପରେ ଫେରିଥିଲେ ପରଦେଶ, ହେଲେ ଆଉ ଫେରିଲେନି ଜୀବନ୍ତସୂଚନା ଅନୁଯାୟୀ, ମାଦିନାଯୁ ଗ୍ରାମର ଲିଙ୍ଗନାଥ ପ୍ରଧାନଙ୍କ ପୁଅ ଚିତ୍ତରଞ୍ଜନ ପ୍ରଧାନ (୪୦) ରୋଜଗାର ପାଇଁ ଚେନ୍ନାଇରେ ଦାଦନ ଶ୍ରମିକ ଭାବେ କାମ କରୁଥିଲେ। କିଛି ଦିନ ପୂର୍ବରୁ ସେ ଗାଁକୁ ଫେରି ବିବାହ ପାଇଁ ଝିଅ ଦେଖିଥିଲେ ଏବଂ ତାଙ୍କର ନିର୍ବନ୍ଧ ମଧ୍ୟ ସମ୍ପନ୍ନ ହୋଇଥିଲା। ଦଶହରା ପୂର୍ବରୁ ସେ ପୁଣିଥରେ ରୋଜଗାର ଉଦ୍ଦେଶ୍ୟରେ ଚେନ୍ନାଇ ଫେରିଯାଇଥିଲେ। କିନ୍ତୁ ସେଠାରେ କାମ କରୁଥିବା ସମୟରେ ଅକ୍ଟୋବର ୨୪ ତାରିଖରେ କୌଣସି କାରଣରୁ ତାଙ୍କର ମୃତ୍ୟୁ ଘଟିଥିଲା।ନିଜର ଏକ ଭଲ ଘର ତିଆରି କରିବା, ବିବାହ କରିବା ଓ ସୁନ୍ଦର ସଂସାର ଗଢ଼ିବାର ସ୍ୱପ୍ନ ଦେଖିଥିବା ମାଆ ଛେଉଣ୍ଡ ଚିତ୍ତରଞ୍ଜନଙ୍କ ସବୁ ଆଶା ଅଧୁରା ରହିଗଲା। ଯେଉଁ ବୟସରେ ତାଙ୍କ ଜୀବନରେ ନୂଆ ଅଧ୍ୟାୟ ଆରମ୍ଭ ହେବା କଥା, ସେହି ସମୟରେ ତାଙ୍କ ମୃତ୍ୟୁ ପରିବାରକୁ ଗଭୀର ଶୋକରେ ବୁଡ଼ାଇ ଦେଇଛି।ପୁଅର ଶବ ଆଣିବାକୁ ବନ୍ଧକ ରଖିଲେ ବିଲପୁଅର ମୃତ୍ୟୁ ଦୁଃଖରେ ଭାଙ୍ଗିପଡ଼ିଥିବା ପରିବାର ପାଇଁ ଆର୍ଥିକ ସଙ୍କଟ ଆହୁରି ବଡ଼ ସମସ୍ୟା ହୋଇ ଠିଆ ହୋଇଥିଲା। ଚେନ୍ନାଇରୁ ମରଶରୀରକୁ ଜନ୍ମମାଟିକୁ ଫେରାଇ ଆଣିବା ପାଇଁ ଆବଶ୍ୟକ ଅର୍ଥ ଯୋଗାଡ଼ କରିବାରେ ପରିବାର ଓ ସାହିଭାଇମାନେ ଅସୁବିଧାର ସମ୍ମୁଖୀନ ହୋଇଥିଲେ। ଶେଷରେ ଅନ୍ୟ କୌଣସି ଉପାୟ ନ ପାଇ ବୃଦ୍ଧ ବାପା ଲିଙ୍ଗନାଥ ପ୍ରଧାନ ନିଜର ଏକ ବିଲ ବନ୍ଧକ ରଖି ଟଙ୍କା ଯୋଗାଡ଼ କରିଥିଲେ। ଏହାପରେ ପୁଅର ମରଶରୀର ଗାଁକୁ ଆସିଥିଲା ଏବଂ ଶେଷକୃତ୍ୟ ସମ୍ପନ୍ନ ହୋଇଥିଲା।ଯେଉଁ ବାପା ନିଜ ପୁଅର ବାହାଘର ଦେଖିବା ଓ ତା’ର ସୁଖୀ ସଂସାର ଗଢ଼ିବାର ସ୍ୱପ୍ନ ଦେଖିଥିଲେ, ସେହି ବାପାଙ୍କୁ ଶେଷରେ ପୁଅର ଶବ ଗାଁକୁ ଆଣିବା ପାଇଁ ନିଜ ଜମି ବନ୍ଧକ ରଖିବାକୁ ପଡ଼ିବା ଘଟଣା ସମସ୍ତଙ୍କ ମନକୁ ଆନ୍ଦୋଳିତ କରିଛି।ଅସହାୟ ପରିବାର ପାଖରେ ପହଞ୍ଚିଲା ସ୍ଵାକ୍ଏହି ହୃଦୟବିଦାରକ ଘଟଣା ସମ୍ପର୍କରେ ମୃତକଙ୍କ ପରିବାର ପକ୍ଷରୁ ସୋସିଆଲ ୱାର୍କର୍ସ ଆସୋସିଏସନ୍ ଅଫ୍ କନ୍ଧମାଳ ସ୍ଵାକ୍ ସହ ଯୋଗାଯୋଗ କରାଯାଇଥିଲା। ଖବର ପାଇ ସ୍ଵାକ୍ ର ସଭାପତି ଆମନ ଚନ୍ଦ୍ର ନାୟକଙ୍କ ନେତୃତ୍ୱରେ ଏକ ପ୍ରତିନିଧି ଦଳ ମୃତକଙ୍କ ଘରେ ପହଞ୍ଚି ଶୋକସନ୍ତପ୍ତ ପରିବାରକୁ ଭେଟିଥିଲେ। ପ୍ରତିନିଧି ଦଳ ପରିବାରକୁ ସମବେଦନା ଜଣାଇବା ସହ ଘଟଣା ସମ୍ପର୍କରେ ଆଲୋଚନା କରିଥିଲେ।ପରିବାରକୁ ନିୟମାନୁଯାୟୀ ଉପଲବ୍ଧ ସରକାରୀ ସହାୟତା ଓ ଶ୍ରମିକ କଲ୍ୟାଣ ଯୋଜନାର ସୁବିଧା ଯେପରି ମିଳିପାରିବ, ସେଥିପାଇଁ ସ୍ଵାକ୍ ପକ୍ଷରୁ ପଦକ୍ଷେପ ନିଆଯାଇଛି। ଏନେଇ ଜିଲ୍ଲା ପ୍ରଶାସନ ସହ ଯୋଗାଯୋଗ କରାଯିବା ସହ ଆବଶ୍ୟକ ସହାୟତା ପ୍ରଦାନ ପାଇଁ ଜିଲ୍ଲାପାଳ ଓ ଜିଲ୍ଲା ଶ୍ରମ ଅଧିକାରୀଙ୍କୁ ଲିଖିତ ଭାବେ ଅବଗତ କରାଯାଇଛି। ଅସହାୟ ପରିବାରକୁ ଉପଯୁକ୍ତ ସହାୟତା ମିଳିବା ପର୍ଯ୍ୟନ୍ତ ସଂଗଠନ ପକ୍ଷରୁ ପ୍ରୟାସ ଜାରି ରହିବ ବୋଲି ଜଣାପଡ଼ିଛି।ଏହି ସମୟରେ ସ୍ଵାକ୍ ର ସମ୍ପାଦକ ହୃଷୀକେଶ ପ୍ରଧାନ, କୋଷାଧ୍ୟକ୍ଷ ସାମନ୍ତ ଶେଖର ନାୟକ, ଉପଦେଷ୍ଟା ଗୋଲକ ବିହାରୀ ପଟ୍ଟନାୟକ ଓ ଅରୁଣ କୁମାର ଷଡ଼ଙ୍ଗୀ, ସଦସ୍ୟ ସନ୍ତୋଷ ଦିଗାଲ ଏବଂ ସଦସ୍ୟା ମିନାକ୍ଷୀ ପ୍ରଧାନ ଉପସ୍ଥିତ ଥିଲେ।କନ୍ଧମାଳ ଜିଲ୍ଲାରେ ଦାଦନ ଶ୍ରମିକଙ୍କ ମୃତ୍ୟୁ ଘଟଣା ବାରମ୍ବାର ସାମ୍ନାକୁ ଆସିବା ଚିନ୍ତାର ବିଷୟ ପାଲଟିଛି। ଗତ ତିନି ମାସ ମଧ୍ୟରେ ଜିଲ୍ଲାର ୨୧ ଜଣ ଦାଦନ ଶ୍ରମିକଙ୍କ ମୃତ୍ୟୁ ଘଟିଥିବା ତଥ୍ୟ ଜିଲ୍ଲାର ସାମାଜିକ ଓ ଆର୍ଥିକ ସ୍ଥିତିକୁ ନେଇ ଗଭୀର ପ୍ରଶ୍ନ ସୃଷ୍ଟି କରିଛି। ଜୀବିକା ଅନ୍ୱେଷଣରେ ଘରଦ୍ୱାର ଛାଡ଼ି ଅନ୍ୟ ରାଜ୍ୟକୁ ଯାଉଥିବା ଶ୍ରମିକଙ୍କ ସୁରକ୍ଷା, ସେମାନଙ୍କ କାର୍ଯ୍ୟସ୍ଥଳର ପରିସ୍ଥିତି ଏବଂ ଦୁର୍ଘଟଣା ବା ମୃତ୍ୟୁ ସମୟରେ ପରିବାରକୁ ତ୍ୱରିତ ସହାୟତା ଯୋଗାଇବା ବ୍ୟବସ୍ଥାକୁ ନେଇ ଏବେ ଗୁରୁତ୍ୱର ସହ ଚିନ୍ତା କରିବାର ସମୟ ଆସିଛି।କେବଳ ମୃତ୍ୟୁ ପରେ ସମବେଦନା ଜଣାଇବା କିମ୍ବା ଆର୍ଥିକ ସହାୟତା ଦେବା ଯଥେଷ୍ଟ ନୁହେଁ। ଦାଦନ ଶ୍ରମିକଙ୍କ ପଞ୍ଜୀକରଣ, ସେମାନଙ୍କ ଗନ୍ତବ୍ୟସ୍ଥଳ ଓ ନିଯୁକ୍ତିଦାତାଙ୍କ ସମ୍ପର୍କିତ ତଥ୍ୟ, ସୁରକ୍ଷିତ କାର୍ଯ୍ୟ ପରିବେଶ, ଜରୁରୀକାଳୀନ ସହାୟତା ଏବଂ ପରିବାରର ଜୀବିକା ସୁରକ୍ଷାକୁ ସୁନିଶ୍ଚିତ କରିବା ଆବଶ୍ୟକ। ଏଥିସହ କନ୍ଧମାଳ ଜିଲ୍ଲାରେ ସ୍ଥାନୀୟ ରୋଜଗାର ଓ ଆତ୍ମନିର୍ଭରଶୀଳତାର ସୁଯୋଗ ବଢ଼ାଇବା ଉପରେ ମଧ୍ୟ ସରକାର ଗୁରୁତ୍ୱ ଦେବା ଦରକାର।ଦାଦନ ଦୁଃଖର ସ୍ଥାୟୀ ସମାଧାନ ପାଇଁ ସରକାରଙ୍କ ହସ୍ତକ୍ଷେପ ଜରୁରୀ। ଚିତ୍ତରଞ୍ଜନଙ୍କ ପରି ଆଉ କୌଣସି ପରିବାର ଯେପରି ଏଭଳି ଅସହାୟ ପରିସ୍ଥିତିର ସମ୍ମୁଖୀନ ନ ହୁଅନ୍ତି, ସେଥିପାଇଁ ତ୍ୱରିତ ଓ ଠୋସ୍ ପଦକ୍ଷେପ ନେବାକୁ ସ୍ଵାକ୍ ପକ୍ଷରୁ ସରକାର ଓ ଜିଲ୍ଲା ପ୍ରଶାସନଙ୍କୁ ଅନୁରୋଧ କରାଯାଇଛି।