*ପାରଳା ସହରର ମୁଖ୍ୟ ରାସ୍ତା ପ୍ରଶସ୍ତିକରଣରେ ବାଧକ କିଏ? ଦୁର୍ଘଟଣା ବଢ଼ାଉଛି ଚିନ୍ତା*
ଗଜପତି,୧୯. ୧୦(ମନୋଜ କୁମାର ପାଢୀଙ୍କ ରିପୋର୍ଟ):- ଗଜପତି ଜିଲ୍ଲାର ଐତିହାସିକ ସହର ପାରଳାଖେମୁଣ୍ଡିର ମୁଖ୍ୟ ରାସ୍ତା ପ୍ରଶସ୍ତିକରଣ କାର୍ଯ୍ୟ କେବେ ସମ୍ପୂର୍ଣ୍ଣ ହେବ? ଏହି କାର୍ଯ୍ୟରେ ବାଧକ କିଏ? ପ୍ରଶାସନିକ ଅବହେଳା ନା ରାଜନୈତିକ ଇଚ୍ଛାଶକ୍ତିର ଅଭାବ? ଏଭଳି ଅନେକ ପ୍ରଶ୍ନ ଏବେ ସହରବାସୀଙ୍କ ମନରେ ଉଙ୍କି ମାରୁଛି। ସହରରେ ଦିନକୁ ଦିନ ଗାଡ଼ିମଟର ସଂଖ୍ୟା ବୃଦ୍ଧି ପାଉଥିବା ବେଳେ ସଂକୀର୍ଣ୍ଣ ରାସ୍ତା ଯୋଗୁଁ ଜନସାଧାରଣଙ୍କର ଯାତାୟାତ ଦୁର୍ବିସହ ହୋଇପଡ଼ିଛି। ଏପରିକି ପଥଚାରୀମାନେ ମଧ୍ୟ ରାସ୍ତାରେ ସୁରକ୍ଷିତ ଭାବେ ଚାଲିବା କଷ୍ଟକର ହୋଇପଡ଼ୁଛି।ସ୍ୱତନ୍ତ୍ର ଓଡ଼ିଶା ପ୍ରଦେଶ ଗଠନରେ ଅଗ୍ରଣୀ ଭୂମିକା ନେଇଥିବା ପାରଳା ମହାରାଜା ଶ୍ରୀକୃଷ୍ଣଚନ୍ଦ୍ର ଗଜପତି ନାରାୟଣ ଦେବଙ୍କ ଏହି ମାଟି ଦିନେ ଶିକ୍ଷା, କୃଷି ଓ ଗମନାଗମନ କ୍ଷେତ୍ରରେ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲା। କିନ୍ତୁ ଆଜି ସହରର କ୍ରମବର୍ଦ୍ଧିଷ୍ଣୁ ଜନସଂଖ୍ୟା ଓ ଯାନବାହନ ଚଳାଚଳ ବୃଦ୍ଧି ପାଇଥିଲେ ମଧ୍ୟ ରାସ୍ତାର ଭିତ୍ତିଭୂମି ସେହି ଅନୁପାତରେ ବିକଶିତ ହୋଇ ପାରିନାହିଁ। ଫଳରେ ଐତିହାସିକ ସହରରେ ଦୈନନ୍ଦିନ ଯାତାୟାତ ବ୍ୟବସ୍ଥା ଗୁରୁତର ଭାବେ ବାଧାପ୍ରାପ୍ତ ହୋଇଛି।ପ୍ରଶାସନିକ ସ୍ତରରେ ଏହି ରାସ୍ତାର ଉନ୍ନତିକରଣ ପାଇଁ ପଦକ୍ଷେପ ନିଆଯାଇଥିବା ସତ୍ତ୍ୱେ ତାହାର ସୁଫଳ ସାଧାରଣ ଲୋକଙ୍କ ନିକଟରେ କେବେ ପହଞ୍ଚିବ, ତାହା ଏବେ ବଡ଼ ପ୍ରଶ୍ନ। ଉପଲବ୍ଧ ଟେଣ୍ଡର ସୂଚନା ଅନୁଯାୟୀ, ପାରଳାଖେମୁଣ୍ଡି ପୌରପାଳିକା ଅନ୍ତର୍ଗତ ମେଡିକାଲ ଛକଠାରୁ କୋର୍ଟ ଛକ ପର୍ଯ୍ୟନ୍ତ ୨.୭୩ କିଲୋମିଟର ରାସ୍ତାର ଉନ୍ନତିକରଣ ପାଇଁ ପ୍ରାୟ ୭ କୋଟି ୬ ଲକ୍ଷ ୮୮ ହଜାର ଟଙ୍କାର ଟେଣ୍ଡର ଆହ୍ୱାନ କରାଯାଇଥିଲା। ସେପ୍ଟେମ୍ବର ୨୦୨୬ର ଉପଲବ୍ଧ ରେକର୍ଡରେ ଏହାର ବୈଷୟିକ ମୂଲ୍ୟାୟନ ପ୍ରକ୍ରିୟା ଚାଲିଥିବା ଉଲ୍ଲେଖ ରହିଛି। ତେବେ ଏହାର ପରବର୍ତ୍ତୀ ସ୍ଥିତି ଓ କାର୍ଯ୍ୟ ଆରମ୍ଭ ହୋଇଛି କି ନାହିଁ, ସେ ସମ୍ପର୍କରେ ସ୍ପଷ୍ଟ ତଥ୍ୟ ମିଳିନାହିଁ।ଅନ୍ୟପକ୍ଷରେ, ପାରଳାଖେମୁଣ୍ଡି ପୌରପାଳିକାର ୧୦.୪ କିଲୋମିଟର ରାସ୍ତାର ପ୍ରଶସ୍ତୀକରଣ ଓ ସୁଦୃଢ଼ୀକରଣ କାର୍ଯ୍ୟ ସହ ଜଡ଼ିତ ବିଦ୍ୟୁତ୍ ଲାଇନ୍ ଓ ସବ୍ଷ୍ଟେସନ୍ ସ୍ଥାନାନ୍ତର ପାଇଁ ମଧ୍ୟ ପ୍ରାୟ ୧ କୋଟି ୪ ଲକ୍ଷ ୩୭ ହଜାର ଟଙ୍କାର ଟେଣ୍ଡର ପ୍ରକ୍ରିୟା ରହିଛି।
ତେବେ କେଉଁ ଅଂଶରେ କାର୍ଯ୍ୟ ଆରମ୍ଭ ହୋଇଛି, କେଉଁଠି ବାଧା ରହିଛି ଏବଂ କେବେ ସମ୍ପୂର୍ଣ୍ଣ ହେବ, ତାହା ପ୍ରଶାସନ ସ୍ପଷ୍ଟ କରିବା ଆବଶ୍ୟକ ବୋଲି ବୁଦ୍ଧିଜୀବୀମାନେ ମତ ରଖିଛନ୍ତି।ସହରର ପୋଲିସ ଷ୍ଟେସନଠାରୁ କ୍ରିଷ୍ଣା ସିନେମା ହଲ୍ ପର୍ଯ୍ୟନ୍ତ ରାସ୍ତାରେ ଉପୁଜୁଥିବା ଯାତାୟାତ ସମସ୍ୟା ନେଇ ସ୍ଥାନୀୟ ଲୋକେ ଗୁରୁତର ଅଭିଯୋଗ ଅଭିଯୋଗ ଆଣିଛନ୍ତି। କିଛି ଦିନ ପୂର୍ବେ ପୌରପାଳିକା କାର୍ଯ୍ୟାଳୟ ସମ୍ମୁଖରେ ଏକ ସଡ଼କ ଦୁର୍ଘଟଣାରେ ଜଣେ ବରିଷ୍ଠ ନାଗରିକ ଆହତ ହେବା ଏବଂ ଏସ୍କେସିଜି କଲେଜ ହଷ୍ଟେଲ ନିକଟରେ ସଡ଼କ ଦୁର୍ଘଟଣାରେ ଜଣଙ୍କର ମୃତ୍ୟୁ ହେବା ଘଟଣା ସହରବାସୀଙ୍କ ଚିନ୍ତା ବଢ଼ାଇଛି। ରାସ୍ତାରେ ପଥଚାରୀଙ୍କ ପାଇଁ ସୁରକ୍ଷିତ ସ୍ଥାନ, ଯାନବାହନ ପାଇଁ ପର୍ଯ୍ୟାପ୍ତ ରାସ୍ତା ଏବଂ ଆବଶ୍ୟକ ଟ୍ରାଫିକ୍ ବ୍ୟବସ୍ଥା ନଥିଲେ ଦୁର୍ଘଟଣାର ଆଶଙ୍କା ଆହୁରି ବଢ଼ିବା ସ୍ୱାଭାବିକ। ଏଣୁ ଏଭଳି ପରିସ୍ଥିତିରେ କେବଳ ଯୋଜନା ଘୋଷଣା କିମ୍ବା ଟେଣ୍ଡର ଆହ୍ୱାନ କରିଦେଲେ ଦାୟିତ୍ୱ ଶେଷ ହୋଇଯାଏ ନାହିଁ। ରାସ୍ତା ପ୍ରଶସ୍ତୀକରଣରେ ଯଦି ଜମି ଅଧିଗ୍ରହଣ, ଜବରଦଖଲ ହଟାଇବା, ବିଦ୍ୟୁତ୍ ଖୁଣ୍ଟ ସ୍ଥାନାନ୍ତର କିମ୍ବା ଅନ୍ୟ କୌଣସି ପ୍ରଶାସନିକ ସମସ୍ୟା ରହିଛି, ତେବେ ତାହାର ସମାଧାନ ପାଇଁ ସମୟସୀମା ଧାର୍ଯ୍ୟ କରାଯିବା ଦରକାର।
ଜିଲ୍ଲା ପ୍ରଶାସନ, ପୌରପାଳିକା ଓ ସମ୍ପୃକ୍ତ ରାସ୍ତା ନିର୍ମାଣ ବିଭାଗ ମଧ୍ୟରେ ସମନ୍ୱୟ ରକ୍ଷା କରି ତୁରନ୍ତ କାର୍ଯ୍ୟକୁ ଆଗେଇ ନେବା ଆବଶ୍ୟକ।ପାରଳାଖେମୁଣ୍ଡିବାସୀଙ୍କ ଦାବି ହେଉଛି, ମୁଖ୍ୟ ରାସ୍ତା ପ୍ରଶସ୍ତୀକରଣର ବର୍ତ୍ତମାନ ସ୍ଥିତି, ଅଟକି ରହିଥିବା କାର୍ଯ୍ୟର କାରଣ ଓ ନିର୍ଦ୍ଧାରିତ ସମୟସୀମା ସମ୍ପର୍କରେ ପ୍ରଶାସନ ସାର୍ବଜନୀନ ଭାବେ ସ୍ପଷ୍ଟୀକରଣ ଦେଉ। ଏହା ସହ ଦୁର୍ଘଟଣା ପ୍ରବଣ ସ୍ଥାନଗୁଡ଼ିକରେ ତୁରନ୍ତ ସତର୍କତାମୂଳକ ବ୍ୟବସ୍ଥା ଗ୍ରହଣ କରାଯାଉ।ଶେଷରେ ପ୍ରଶ୍ନ ଉଠୁଛି—ପାରଳା ସହରର ମୁଖ୍ୟ ରାସ୍ତା ପ୍ରଶସ୍ତୀକରଣରେ ପ୍ରକୃତ ବାଧକ କିଏ? ଆଉ କେତେ ଦୁର୍ଘଟଣା ଘଟିଲେ ପ୍ରଶାସନ ତତ୍ପର ହେବ? ଜନସାଧାରଣଙ୍କ ସୁରକ୍ଷା ଓ ସହରର ବିକାଶକୁ ଦୃଷ୍ଟିରେ ରଖି ଏହି ପ୍ରଶ୍ନର ଉତ୍ତର ଦେବା ସହ ତୁରନ୍ତ ଆବଶ୍ୟକ ପଦକ୍ଷେପ ନେବା ପାଇଁ ଦାବି ହୋଇଛି। ଏପରିକି ବାଇପାସ୍ ରାସ୍ତା ନିର୍ମାଣ କାର୍ଯ୍ୟ ମଧ୍ୟ ଶୀତଳଭଣ୍ଡାରକୁ ଚାଲିଯାଇଥିବା ଚର୍ଚ୍ଚା ଲାଗିରହିଛି।
