ନିଆରା ଶିକ୍ଷାଦାନ, ବୌଦ୍ଧିକ ବିକାଶ – କୋରାପୁଟର ତରୁଣ କୁମାର ଦାଶଙ୍କୁ ରାଷ୍ଟ୍ରପତି ପୁରସ୍କାର
କୋରାପୁଟ, ୨୮ ଅଗଷ୍ଟ (ସ.ପ୍ର): କୋରାପୁଟ ପିଏମଶ୍ରୀ କେନ୍ଦ୍ରୀୟ ବିଦ୍ୟାଳୟର ଶିକ୍ଷକ ତରୁଣ କୁମାର ଦାଶ ଛାତ୍ରବତ୍ସଳ ଓ ନିଆରା ଶିକ୍ଷାଦାନ ପ୍ରଣାଳୀ ପାଇଁ ପରିଚିତ। ପାଠପଢ଼ା ସହିତ ପିଲାଙ୍କ ଶାରୀରିକ, ମାନସିକ ଓ ବୌଦ୍ଧିକ ବିକାଶକୁ ସେ ସର୍ବଦା ଗୁରୁତ୍ୱ ଦେଇଆସୁଛନ୍ତି।
ନୂତନ କୌଶଳରେ ଶିକ୍ଷାଦାନ କରି ସେ ପିଲାଙ୍କ ମନରେ ଥିବା ଦ୍ଵନ୍ଦ୍ୱ ଦୂର କରନ୍ତି। ଛାତ୍ରଛାତ୍ରୀମାନେ ବିଭିନ୍ନ କାର୍ଯ୍ୟକ୍ରମରେ ସକ୍ରିୟ ହୋଇଯାଉଥିବାରୁ ସେମାନଙ୍କ ମଧ୍ୟରେ ଆତ୍ମବିଶ୍ୱାସ ବୃଦ୍ଧି ଘଟିଛି। ମାଣ୍ଡିଆ ଖାଇବାର ଆଗ୍ରହ ବୃଦ୍ଧି, ସ୍କୁଲରେ କ୍ଷୁଦ୍ର ନାଟକ ପ୍ରସ୍ତୁତି ଓ ତାହାକୁ ରାଜ୍ୟ ଓ ଜାତୀୟସ୍ତରରେ ପରିବେଷଣ କରିବାରେ ସେ ଅଗ୍ରଣୀ। ତାଙ୍କ ୩ଟି କ୍ଷୁଦ୍ର ଚଳଚ୍ଚିତ୍ର ଜାତୀୟସ୍ତରରେ ପୁରସ୍କୃତ ହୋଇଛି।
କୋରୋନା କାଳରେ ନିଜେ ଆକ୍ରାନ୍ତ ହୋଇଥିବା ସତ୍ତ୍ୱେ ଛାତ୍ରଛାତ୍ରୀଙ୍କୁ ଶିକ୍ଷାରୁ ଦୂରେଇ ନହେବାପାଇଁ ସେ ଅବିରତ ପ୍ରୟାସ କରିଥିଲେ।
ସେପ୍ଟେମ୍ବର ୫ ଗୁରୁଦିବସରେ ସେ ରାଷ୍ଟ୍ରପତିଙ୍କ ଠାରୁ ଜାତୀୟ ଶିକ୍ଷକ ସମ୍ମାନ ପାଇବେ। ପୂର୍ବରୁ ସେ ୨୦୧୩ରେ ସି.ଭି. ରମଣ ବିଜ୍ଞାନ ଶିକ୍ଷାଦାନ ପୁରସ୍କାର, ୨୦୧୪ରେ ନବାଚାର ପୁରସ୍କାର ଓ ୨୦୨୩ରେ କେନ୍ଦ୍ରୀୟ ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଠାରୁ ଉତ୍କର୍ଷ ଶିକ୍ଷା ପୁରସ୍କାରରେ ସମ୍ମାନିତ ହୋଇଛନ୍ତି।
ଶିକ୍ଷକ ଭାବେ ନୁହେଁ, ସେ ଜଣେ ବାସ୍ତବଧର୍ମୀ କବି ଓ ରାଷ୍ଟ୍ରୀୟସ୍ତରର ତାଲିମଦାତା ଭାବେ ମଧ୍ୟ ପରିଚିତ। ବିଦ୍ୟାର୍ଥୀଙ୍କ ବ୍ୟାଗ ଓଜନ କମାଇବାରେ ମଧ୍ୟ ତାଙ୍କ ଅନନ୍ୟ ଭୂମିକା ରହିଛି।
ଏହି ସମ୍ମାନ ତାଙ୍କ ଶିକ୍ଷକତା ଜୀବନକୁ ଆହୁରି ପ୍ରେରଣାଦାୟୀ କରିବ।