କୋରାପୁଟ: ନିଜ ସଂସ୍ଥାରୁ ଲୁଟ୍ କରି ନିଜେ ଫସିଗଲେ କର୍ମଚାରୀ, ୧୧ ଲକ୍ଷ ଟଙ୍କା ଘଟଣାରେ ୩ ଗିରଫ
କୋରାପୁଟ ଟାଉନ ଥାନା ଅନ୍ତର୍ଗତ ଏକ ସଂସ୍ଥାର କର୍ମଚାରୀ ନିଜ ସଂସ୍ଥାରୁ ଠକେଇ କରିଥିବା ଅଭିଯୋଗରେ ଗିରଫ ହୋଇଛନ୍ତି। ଅଭିଯୋଗ ଅନୁସାରେ, ସେ ୧୧ ଲକ୍ଷ ଟଙ୍କା ହଡପ କରିଥିଲେ। ଏହି ଘଟଣା ସହିତ ଜଡିତ ଥିବା ଅନ୍ୟ ୨ ଜଣଙ୍କୁ ମଧ୍ୟ ଗିରଫ କରିଛି ପୁଲିସ।ଏହି ଅପରାଧ ଘଟଣା ଉଦ୍ଘାଟିତ ହେବା ପରେ ଅଞ୍ଚଳରେ ଚର୍ଚ୍ଚା ଶୃଷ୍ଟି ହୋଇଛି। ପୁଲିସ ତଦନ୍ତ ଜାରି ରଖିଛି ଓ ଅଧିକ ତଥ୍ୟ ଆଗକୁ ଆସିପାରେ ବୋଲି ସୂଚନା ମିଳିଛି।
ସୂଚନା ଅନୁଯାୟୀ କୋରାପୁଟରେ ଥିବା ହିଟାଚି କେସ ମେନେଜମେଣ୍ଟ ସର୍ଭିସେସ୍ କମ୍ପାନିର କୋରାପୁଟ ବ୍ରାଞ୍ଚର ଶାଖା ପରିଚାଳକ ଆଶିଶ ଜେନା ଗତ ୨୩ ତାରିଖ ଦିନ କୋରାପୁଟ ଥାନାରେ ଦେଇଥିବା ଏତଲା ଅନୁଯାୟୀ ତାଙ୍କର ଜଣେ କର୍ମଚାରୀ ଶିବ ପ୍ରସାଦ ନାଗ ଏଲଆଇସି ଅଫିସ ଓ ଆପୋଲୋ ଫାର୍ମାସି କୋରାପୁଟରୁ ୧୧ ଲକ୍ଷ ୪୩୭୦ ଟଙ୍କା ଉଠାଇ କୋରାପୁଟସ୍ଥିତ ଆକ୍ସିସ୍ ବ୍ୟାଙ୍କରେ ଟଙ୍କା ଡିପୋଜିଟ୍ କରିବାର ଥିଲା। କିନ୍ତୁ ସେଠାରେ ସେ ଡିପୋଜିଟ୍ କରିନାହାନ୍ତି। ତାଙ୍କ ସହ ଯୋଗାଯୋଗ କରିଲେ ଡକାୟତମାନେ ତାଙ୍କ ଠାରୁ ଏହି ଟଙ୍କା ଲୁଟ୍ କରି ନେଇଯାଇଛନ୍ତି।
ଏ ନେଇ ସନ୍ଦେହ ହେଉଥିବାରୁ ତଦନ୍ତ କରିବା ପାଇଁ ଟାଉନ ଥାନାରେ ଏତଲା ଦେଇଥିଲେ। ପୁଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି। ପୁଲିସ ପ୍ରଥମେ ବିଭିନ୍ନ ସୂତ୍ରରୁ ତଦନ୍ତ କରିବା ପରେ ଶିବ ପ୍ରସାଦ ନାଗକୁ ଉଠାଇ ନେଇ ସିସିଟିଭି କ୍ୟାମେରାରୁ ଜଣାପଡିଲା ଯେ ନିଜେନିଜେ ଏହି ଟଙ୍କା ଲୁଟ୍ ପାଇଁ ଉଦ୍ୟମ କରିଥିଲେ। ତାଙ୍କୁ ସାହାଯ୍ୟ କରିଥିଲେ ଜୟପୁରର ବାଦଲ ବାଗ। ବାଦଲ ବାଗ ଓ ଶିବ ପ୍ରସାଦ ନାଗ ମିଶି କରି ଏହା ବୀମା ଟଙ୍କା ହୋଇଥିବାରୁ ଏହି ଲୁଟ ରଚନା କରିଥିଲେ।ଲୁଟ୍ ପରେ ମାମଲାରୁ ବର୍ତ୍ତିବା ପାଇଁ ବାଦଲ ବାଗ କୋଷାଗୁମୁଡାର ଦୟାନିଧୀ ଗଣ୍ଡ ଓ ପାପଡାହାଣ୍ଡିର ଖିରସିନ୍ଧୁ ବିନ୍ଧାଣୀ ଙ୍କ ସହାୟତା ନେଇଥିଲେ।
ପୂର୍ବରୁ ଏହି ୨ ଜଣଙ୍କ ନାମରେ ବିଭିନ୍ନ ଥାନାରେ ମାମଲା ରହିଛି। ସେମାନେ ସମସ୍ତେ ମିଶି ଯେଉଁ ସ୍ଥାନରେ ସିସି ଟିଭି ନଥିବ ସେହି ସ୍ଥାନରୁ ଲୁଟ୍ ପାଇଁ ଯୋଜନା କରିଥିଲେ। ସେହି ସ୍ଥାନରୁ ଗଲା ପରେ ନିଜ ନିଜ ଭିତରେ ଟଙ୍କା ବାଣ୍ଟିବେ ଏବଂ ପରେ ଥାନାରେ ଏତଲା ଦେବେ ବୋଲି ଯୋଜନା କରିଥିଲେ।ଏହି ମାମଲାରେ ଶିବ ପ୍ରସାଦ ନାଗ, ବାଦଲ ବାଗ ଓ କ୍ଷିରସିନ୍ଧୁ ବିନ୍ଧାଣୀକୁ ଗିରଫ କରାଯାଇଛି। ତେବେ ଦୟାନିଧି ଗଣ୍ଡ ଫେରାର ଥିବା ବେଳେ ଦୟାନିଧିର ମୋଟର ସାଇକେଲକୁ ଜବତ କରାଯାଇଛି। ସେମାନଙ୍କ ନିକଟରୁ ୪୦୧୦୩୧୦ ଜବତ ହୋଇଛି ବଳକା ଟଙ୍କା ଦୟାନିଧୀ ପାଖରେ ରହିଛି ବୋଲି କହିଛନ୍ତି ଥାନା ଆଇଆଇସି ସତ୍ୟାନନ୍ଦ ପାତ୍ର।