ସୁନାବେଡ଼ାରେ ବିଜୁଳି ଯୋଗାଣ ବ୍ୟବସ୍ଥାକୁ ସୁଦୃଢ଼ କଲା ଟିପିଏସ୍ଓଡିଏଲ୍ ୭,୦୦୦ ଉପଭୋକ୍ତାଙ୍କୁ ମିଳିବ ଗୁଣାତ୍ମକ ବିଜୁଳି
କୋରାପୁଟ, ଫେବ୍ରୁଆରୀ- କୋରାପୁଟ ଜିଲ୍ଲା ସୁନାବେଡ଼ା ଓ ଆଖପାଖ ଅଞ୍ଚଳରେ ବିଜୁଳି ଯୋଗାଣ ବ୍ୟବସ୍ଥାକୁ ସୁଦୃଢ଼ କରିବା ନିମନ୍ତେ ଟିପିଏସ୍ଓଡିଏଲ୍ ପକ୍ଷରୁ ଭିତ୍ତିଭୂମି ବିକାଶ କରାଯାଇଛି । ଟ୍ରାନ୍ସଫର୍ମରର କ୍ଷମତା ବୃଦ୍ଧି ଓ ବିଜୁଳି ଲାଇନର ଉନ୍ନତୀକରଣ କରାଯାଇ ସମଗ୍ର ଅଞ୍ଚଳରେ ଭୋଲଟେଜ ସ୍ଥିରତା ଆଣିବା ସହ ଭରସାଯୋଗ୍ୟ ବିଜୁଳି ଯୋଗାଣ ଦିଗରେ କାର୍ଯ୍ୟ କରାଯାଇଛି । ଟିପିଏସ୍ଓଡିଏଲ୍ ସୁନାବେଡ଼ା ପ୍ରାଇମେରୀ ସବଷ୍ଟେସନରେ ଏକ ନୂତନ ୮ ଏମଭିଏ ଟ୍ରାନ୍ସଫର୍ମର କାର୍ଯ୍ୟକ୍ଷମ କରାଯାଇଛି । ଯାହା ଫଳରେ ସବଷ୍ଟେସନର ସାମଗ୍ରିକ କ୍ଷମତା ୧୬.୧୫ ଏମଭିଏକୁ ବୃଦ୍ଧି ପାଇଛି । ସୁନାବେଡ଼ା ଅଞ୍ଚଳରେ ତ୍ୱରିତ ବେଗରେ ବଢୁଥିବା ବିଜୁଳି ଚାହିଦାକୁ ମେଣ୍ଟାଇବା ଦିଗରେ ଏହି ନୂତନ ଭିତ୍ତିଭୂମି ସହାୟକ ହେଉଛି । ସବଷ୍ଟେସନର କ୍ଷମତା ବଢିବା ପରେ ଭୋଲଟେଜ ସମସ୍ୟା ଦୂର ହୋଇଛି । ବିଜୁଳି ଯୋଗାଣରେ ସ୍ଥିରତା ଆସିଛି ଓ ବିଜୁଳି ପରିଚାଳନା ଅଧିକ ବ୍ୟବସ୍ଥିତ ହୋଇପାରିଛି ।
ଭିତ୍ତିଭୂମି ମରାମତି ସମୟରେ ଉପଭୋକ୍ତାମାନେ ଅନାବଶ୍ୟକ ବିଜୁଳି ବ୍ୟାହତର ସାମ୍ନା କରୁନାହାଁନ୍ତି । ଅତିରିକ୍ତ ଫିଡର ଓ ଅତିରିକ୍ତ ଟ୍ରାନ୍ସଫର୍ମର ଯୋଗେ ଅଞ୍ଚଳକୁ ବିଜୁଳି ଯୋଗାଣ ଜାରି ରହୁଛି । ସୁନାବେଡ଼ା ଓ ଏହାର ଆଖପାଖ ଅଞ୍ଚଳର ପାଖାପାଖି ୭ ହଜାର ଉପଭୋକ୍ତାଙ୍କୁ ଏହି ଗୁଣାତ୍ମକ ସେବା ମିଳିପାରିଛି । ଏଥି ମଧ୍ୟରେ – ସୁନାବେଡ଼ା ଏନଏସି ଟାଉନ, ସୁନାବେଡ଼ା ଏନଏସି ଗ୍ରାମୀଣ, ବିଭିନ୍ନ ସରକାରୀ କାର୍ଯ୍ୟାଳୟ, ଜାଡ଼ଗୁଡ଼ା ଓ ସେମିଳିଗୁଡ଼ା ବ୍ଲକ୍ ଅନ୍ତର୍ଗତ ଅନେକ ଅଞ୍ଚଳ ସାମିଲ ରହିଛି । ସୁନାବେଡ଼ା କୋରାପୁଟ ଜିଲ୍ଲାର ଏକ ପ୍ରମୁଖ ଶିଳ୍ପକେନ୍ଦ୍ର ।
ଏଠାରେ ଭାରତ ସରକାରଙ୍କର ପ୍ରମୁଖ ରାଷ୍ଟ୍ରାୟତ୍ତ ଉଦ୍ୟୋଗ ହିନ୍ଦୁସ୍ତାନ ଏରୋନଟିକ୍ସ ଲିମିଟେଡ୍(ଏଚ୍.ଏ.ଏଲ୍)ର ଇଞ୍ଜିନ ଡିଭିଜନ ରହିଛି । ଯାହାଫଳରେ ଏହି ଅଞ୍ଚଳର ଦ୍ରୁତ ସହରୀକରଣ ହେଉଛି । ସେହିଭଳି ସୁନାବେଡ଼ା ଏହାର ପ୍ରାକୃତିକ ପରିବେଶ, ଆଦିବାସୀ ସଂସ୍କୃତି, ଓ ପର୍ଯ୍ୟଟନ ସମ୍ଭାବନା ପାଇଁ ଜଣାଶୁଣା । ତେଣୁ ଏଠାରେ ବିଜୁଳି ଚାହିଦା କ୍ରମାଗତ ଭାବେ ବଢ଼ୁଛି । ଏହାକୁ ଦୃଷ୍ଟିରେ ରଖି ଭିତ୍ତିଭୂମି ବିକାଶ କରାଯାଇଛି । କମ୍ପାନୀ ନିଜର ପ୍ରାଇମେରୀ ସବଷ୍ଟେସନର କ୍ଷମତା ବୃଦ୍ଧି ବ୍ୟତୀତ ସୁନାବେଡ଼ା ଗ୍ରୀଡ୍ ସବଷ୍ଟେସନରୁ ପ୍ରାଇମେରୀ ସବଷ୍ଟେସନକୁ ସଂଯୋଗ କରୁଥିବା 33 କେଭି ଲାଇନର ନବୀକରଣ କାର୍ଯ୍ୟ ମଧ୍ୟ କରିଛି । ଉଚ୍ଚମାନର କଣ୍ଡକ୍ଟରକୁ ବ୍ୟବହାର କରି ଉନ୍ନତ ବିଜୁଳି ଯୋଗାଣ ସୁନିଶ୍ଚିତ କରାଯାଇଛି । ବୈଦ୍ୟୁତିକ ଭାରକୁ ନିୟନ୍ତ୍ରଣ କରିବା ପାଇଁ ପ୍ରାଇମେରୀ ସବଷ୍ଟେସନରେ ବସ୍ ବାର୍ ବ୍ୟବସ୍ଥା ସ୍ଥାପନ କରାଯାଇ ଆଭ୍ୟନ୍ତରୀଣ ପରିଚାଳନାକୁ ମଜଭୁତ କରାଯାଇଛି ।
ଟିପିଏସ୍ଓଡିଏଲର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଶ୍ରୀ ଅମିତ କୁମାର ଗର୍ଗ କହିଛନ୍ତି ଯେ, “ ଦ୍ରୁତ ବିକାଶଶୀଳ ସହରାଞ୍ଚଳଗୁଡ଼ିକର ବିଜୁଳି ଚାହିଦାକୁ ମେଣ୍ଟାଇବା କ୍ଷେତ୍ରରେ କମ୍ପାନୀ ପ୍ରତିବଦ୍ଧତାର ସହ କାର୍ଯ୍ୟ କରୁଛି । ଭିତ୍ତିଭୂମି ନବୀକରଣ କାର୍ଯ୍ୟ କ୍ରମାଗତ ଭାବେ ଜାରି ରହିଛି । ସୁନାବେଡ଼ା ଭଳି ଗୁରୁତ୍ୱପୂର୍ଣ୍ଣ ଅଭିବୃଦ୍ଧି କେନ୍ଦ୍ରରେ ଶିଳ୍ପ ଓ ବାଣିଜ୍ୟର ଅନେକ ସମ୍ଭାବନା ରହିଛି । ଏହି ପ୍ରକ୍ରିୟାରେ ଗୁଣାତ୍ମକ ବିଜୁଳି ଯୋଗାଣର ଆବଶ୍ୟକତାକୁ ଅନୁଭବ କରି ଆମେ ଭିତ୍ତିଭୂମି ବିକାଶ କରୁଛୁ । ଯାହାଫଳରେ ଉପଭୋକ୍ତାମାନେ ଉନ୍ନତ ଜୀବନଶୈଳୀ ଓ ଭରସାଯୋଗ୍ୟ ବିଜୁଳି ସେବା ପାଇପାରୁଛନ୍ତି । ”
