ସହଯୋଗୀ କର୍ମଚାରୀଙ୍କୁ ସଶକ୍ତ କରିବା ପାଇଁ ‘ପ୍ରୋଜେକ୍ଟ ସାଥି’ ଆରମ୍ଭ କଲା ଟିପିଏସ୍ଓଡିଏଲ୍
ବ୍ରହ୍ମପୁର, ଫେବ୍ରୁଆରୀ- ଟିପି ସଦର୍ଣ୍ଣ ଓଡ଼ିଶା ଡିଷ୍ଟ୍ରିବ୍ୟୁସନ୍ ଲିମିଟେଡ୍(ଟିପିଏସ୍ଓଡିଏଲ୍) ପକ୍ଷରୁ ‘ପ୍ରୋଜେକ୍ଟ ସାଥି’ ପ୍ରକଳ୍ପ ଆରମ୍ଭ କରାଯାଇଛି । ବ୍ରହ୍ମପୁରର ଲାଠି ଗ୍ରାମରୁ ଏହି ପ୍ରକଳ୍ପ କାର୍ଯ୍ୟକ୍ଷମ ହୋଇଛି । ଏହା ମାଧ୍ୟମରେ କମ୍ପାନୀର ସହଯୋଗୀ କର୍ମଚାରୀମାନଙ୍କ ନିମନ୍ତେ ଶିକ୍ଷା, ଜୀବିକା, ସ୍ୱାସ୍ଥ୍ୟ ତଥା ସାମଗ୍ରିକ ବିକାଶର ଏକ ସହକାରୀ ଇକୋସିଷ୍ଟମ୍ ପ୍ରସ୍ତୁତ କରାଯାଇଛି । ପ୍ରକଳ୍ପ ଅଧିନରେ, ‘ପ୍ରଗତି ପଥ’ ଭଳି ଯୋଜନାକୁ ସାମିଲ କରାଯାଇଛି, ଯାହା ମାଧ୍ୟମରେ ସହଯୋଗୀ କର୍ମଚାରୀଙ୍କ ପରିବାରର ପିଲାଙ୍କୁ ଛାତ୍ରବୃତ୍ତି ପ୍ରଦାନ କରାଯିବ । ସରକାରୀ ଆଇଟିଆଇ ତଥା ଡିପ୍ଲୋମା କଲେଜରେ ନାମ ଲେଖାଇବା ପ୍ରକ୍ରିୟାରେ ପିଲାମାନଙ୍କୁ କମ୍ପାନୀ ସମସ୍ତ ଆନୁଷଙ୍ଗିକ ସହାୟତା ପ୍ରଦାନ କରିବ । ସେହିପରି ‘ମାର୍ଗ ଦର୍ଶନ’ ଭଳି ପଦକ୍ଷେପ ସେମାନଙ୍କୁ ନିଯୁକ୍ତି କ୍ଷେତ୍ରରେ ଥିବା ଭବିଷ୍ୟତର ସମ୍ଭାବନା ସମ୍ପର୍କରେ ଅବଗତ କରାଇବ ଓ ଆର୍ଥିକ ମାର୍ଗଦର୍ଶନ ଦେବ । ‘ଆରୋଗ୍ୟ ପରିବାର’ ପଦକ୍ଷେପ ଜରିଆରେ ସଞ୍ଜିବନୀ ଭ୍ରାମ୍ୟମାଣ ସ୍ୱାସ୍ଥ୍ୟ ଔଷଧାଳୟ, କର୍ମଚାରୀ ଓ ସେମାନଙ୍କ ପରିବାରକୁ ସୁଗମ ସ୍ୱାସ୍ଥ୍ୟସେବା ଯୋଗାଇବ । ଏହି ଶିବିରଗୁଡ଼ିକ ସ୍ୱାସ୍ଥ୍ୟ ଯାଞ୍ଚ କରିବା ସହ ଅନ୍ୟ ଡ଼ାକ୍ତରୀ ସହାୟତା ପ୍ରଦାନ କରିବେ ।
ବ୍ରହ୍ମପୁରର ଲାଠି ଗ୍ରାମରେ ୬୫ରୁ ଅଧିକ ସହଯୋଗୀ କର୍ମଚାରୀ ଓ ସେମାନଙ୍କ ପରିବାର ସଦସ୍ୟଙ୍କ ଉପସ୍ଥିତିରେ ଏହି ପ୍ରକଳ୍ପକୁ ବିଦ୍ଧିବଦ୍ଧ ଭାବେ ଆରମ୍ଭ କରାଯାଇଥିଲା । ଏହି ଅବସରରେ ଏକ ସ୍ୱାସ୍ଥ୍ୟ ଶିବିର ଆୟୋଜିତ ହୋଇଥିଲା । କମ୍ପାନୀର ସିଏସ୍ଆର୍ ପଦକ୍ଷେପ ଦ୍ୱାରା ପରିଚାଳିତ ‘ଧାଗା’ ଓ ଧୂପବତୀ ସେଣ୍ଟରର ଷ୍ଟଲ ମଧ୍ୟ ସେଠାରେ ପ୍ରଦର୍ଶିତ ହୋଇଥିଲା । ଟିପିଏସ୍ଓଡିଏଲ୍ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଶ୍ରୀ ଅମିତ କୁମାର ଗର୍ଗ କହିଛନ୍ତି ଯେ, “ସହଯୋଗୀ କର୍ମଚାରୀଙ୍କ ସାର୍ବଙ୍ଗୀନ ବିକାଶ କରିବା ଓ ସେମାନଙ୍କୁ ଏକ ଦକ୍ଷ ମାନବ ସମ୍ୱଳରେ ପରିଣତ କରିବା ଦିଗରେ ‘ପ୍ରୋଜେକ୍ଟ ସାଥୀ’ ବିଶେଷ ରୂପେ ସହାୟକ ହେବ । ଟିପିଏସ୍ଓଡିଏଲ୍ ସହ ଜଡ଼ିତ ସଂପ୍ରଦାୟଗୁଡ଼ିକୁ ଶିକ୍ଷା, ସ୍ୱାସ୍ଥ୍ୟ ତଥା ଜୀବିକା ଭଳି ମାନଦଣ୍ଡରେ ସଶକ୍ତ ଓ ସମୃଦ୍ଧ କରିବା ଦିଗରେ ଆମେ ସଦା ପ୍ରୟାସରତ ଅଛୁ। ” ଏଭଳି ପଦକ୍ଷେପ ମାଧ୍ୟମରେ, ଟିପିଏସ୍ଓଡିଏଲ୍ ଦକ୍ଷିଣ ଓଡ଼ିଶାରେ ଏକ ସଶକ୍ତ ଓ ପ୍ରଗତିଶୀଳ ସମାଜ ଗଠନ ଦିଗରେ ଉଦ୍ୟମ ଜାରି ରଖିଛି ।
