କୋରାପୁଟ: ଆମ୍ବେଦକର ଅଧ୍ୟୟନ କେନ୍ଦ୍ର ପ୍ରତିଷ୍ଠା କରିବ ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ | କୁଳପତି ପ୍ରଫେସର ଚକ୍ରଧର ତ୍ରିପାଠୀ ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ ପକ୍ଷରୁ ୨୦୨୪ ଏପ୍ରିଲ ୧୪ ତାରିଖରେ ଭାରତ ରତ୍ନ ବାବାସାହେବ ଡ. ବିଆର୍ ଆମ୍ବେଦକରଙ୍କ ୧୩୪ତମ ଜୟନ୍ତୀ ପାଳିତ ହୋଇଯାଇଛି। ମାନ୍ୟବର କୁଳପତି ପ୍ରଫେସର ଚକ୍ରଧର ତ୍ରିପାଠୀ, ଉପଦେଷ୍ଟା-ଏକାଡେମିକ ଓ ପ୍ରଶାସନ ପ୍ରଫେସର ଭି.ସି ଝା, ହିନ୍ଦୀ ସେଲ୍ ର ଭାରପ୍ରାପ୍ତ ନିର୍ଦେଶକ ପ୍ରଫେସର ହେମରାଜ ମୀନାଙ୍କ ସମେତ ଅଧ୍ୟାପକ ଓ ଅଧିକାରୀମାନେ ଏକାଠି ହୋଇ ଭାରତର ସମ୍ବିଧାନ ନିର୍ମାତା ଦୂରଦର୍ଶୀ ବାବାସାହେବଙ୍କ ଫୋଟୋ ରେ ପୁଷ୍ପ ସୁମନ ଅର୍ପଣ ପୂର୍ବକ ଶ୍ରଦ୍ଧାଞ୍ଜଳୀ ଅର୍ପଣ କରିଥିଲେ ।ଜଣେ ବିଦ୍ଵାନ, ଦୂରଦର୍ଶୀ ଏବଂ ସମାଜ ସଂସ୍କାରକ ଭାବରେ ଡ. ଆମ୍ବେଦକରଙ୍କ ଗଭୀର ପ୍ରଭାବ ବିଷୟରେ ଆଲୋକପାତ କରି ପ୍ରଫେସର ତ୍ରିପାଠୀ ଭାରତର ସାମ୍ବିଧାନିକ ଢାଞ୍ଚା ଗଠନ ଏବଂ ସାମାଜିକ ନ୍ୟାୟ ପାଇଁ ସମର୍ଥନ କରିବାରେ ତାଙ୍କର ଗୁରୁତ୍ୱପୂର୍ଣ୍ଣ ଭୂମିକା ଉପରେ ଆଲୋକପାତ କରିଥିଲେ । ଆଇନର ଶାସନ, ନାଗରିକ ସ୍ୱାଧୀନତା, ଲିଙ୍ଗଗତ ସମାନତା ଏବଂ ଅବହେଳିତ ସମ୍ପ୍ରଦାୟର ସଶକ୍ତୀକରଣ ନୀତି ଉପରେ ଆଧାରିତ ଏକ ସମତାବାଦୀ ସମାଜ ପାଇଁ ଡ. ଆମ୍ବେଦକରଙ୍କ ନିରନ୍ତର ପ୍ରୟାସ ଉପରେ ସେ ବର୍ଣନା କରିଥିଲେ ।
ପ୍ରଫେସର ତ୍ରିପାଠୀ ଡ. ଆମ୍ବେଦକରଙ୍କ ଅବଦାନ ଓ ମହାନତାର ବିଶ୍ୱସ୍ତରୀୟ ମହତ୍ତ୍ୱ ଉପରେ ଗୁରୁତ୍ୱାରୋପ କରିବା ସହ ବ୍ୟକ୍ତିଗତ ଫାଇଦା ପାଇଁ ତାଙ୍କ ଅବଦାନକୁ କିଛି ନ୍ୟସ୍ତସ୍ଵାର୍ଥ ଗୋଷ୍ଠୀ ଅଣଦେଖା କରିବାକୁ ଉଦ୍ୟମ କରାଯାଉଥିବାରୁ ଚିନ୍ତା ପ୍ରକଟ କରିଥିଲେ। ଡ. ଆମ୍ବେଦକରଙ୍କ ଅର୍ଥନୈତିକ, ସାମାଜିକ ଓ ଶିକ୍ଷାଗତ ପ୍ରୟାସକୁ ଜାଣିବା ଓ ଆଲୋଚନା କରିବା ସହ ଆଜିର ଦୁନିଆରେ ଏହାର ପ୍ରାସଙ୍ଗିକତା ଉପରେ ଗୁରୁତ୍ୱାରୋପ କରିବାକୁ ସେ ଆହ୍ୱାନ ଦେଇଥିଲେ। ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ ଡ. ଆମ୍ବେଦକରଙ୍କ ଉପରେ ଆଲୋଚନାର ଏକ ପ୍ରାଥମିକ କେନ୍ଦ୍ର ରେ ପରିଣତ ହେବା ପାଇଁ ସେ ଆକାଂକ୍ଷା ବ୍ୟକ୍ତ କରିଥିଲେ ଯାହା ଆଜିର ତାଙ୍କ ପ୍ରତି ପ୍ରକୃତ ଶ୍ରଦ୍ଧାଞ୍ଜଳି ହେବ ବୋଲି କହିଥିଲେ ।
ଏହି ଅବସରରେ ପ୍ରଫେସର ତ୍ରିପାଠୀ ବିଶ୍ୱବିଦ୍ୟାଳୟରେ ଆମ୍ବେଦକର ଅଧ୍ୟୟନ କେନ୍ଦ୍ର ପ୍ରତିଷ୍ଠା ପାଇଁ ଗୁରୁତ୍ବପୂର୍ଣ ପଦକ୍ଷେପ ନିଆଯିବ ବୋଲି ଘୋଷଣା କରିଥିଲେ, ଯାହା ଡ. ଆମ୍ବେଦକରଙ୍କ ଶିକ୍ଷା ଉପରେ ଆନ୍ତଃବିଭାଗୀୟ ଗବେଷଣା ପାଇଁ ସମର୍ପିତ ହେବ । ଏହାବ୍ୟତୀତ ବିଶ୍ୱବିଦ୍ୟାଳୟ କ୍ୟାମ୍ପସରେ ଡ. ଆମ୍ବେଦକରଙ୍କ ପ୍ରତିମୂର୍ତ୍ତି ନିର୍ମାଣ କରିବାକୁ ସେ ଇଚ୍ଛା ପ୍ରକାଶ କରିଥିଲେ, ଯାହା ତାଙ୍କ ଆଦର୍ଶକୁ ବଜାୟ ରଖିବା ପାଇଁ ବିଶ୍ୱବିଦ୍ୟାଳୟର ପ୍ରତିବଦ୍ଧତାର ପ୍ରତୀକ ହେବ ।ଡ. ଆମ୍ବେଦକରଙ୍କ ବହୁମୁଖୀ ବ୍ୟକ୍ତିତ୍ୱକୁ ସମ୍ବୋଧିତ କରି ପ୍ରଫେସର ଝା ଜଣେ ଆଇନଜୀବୀ, ଅର୍ଥନୀତିଜ୍ଞ, ରାଜନେତା ଏବଂ ସମାଜ ସଂସ୍କାରକ ଭାବରେ ତାଙ୍କର ଭୂମିକାକୁ ପ୍ରଶଂସା କରିବା ସହ ଭେଦଭାବ ବିରୋଧରେ ତାଙ୍କର ନିରବଚ୍ଛିନ୍ନ ସମର୍ଥନ ଏବଂ ମହିଳା ଓ ଶ୍ରମିକଙ୍କ ଅଧିକାର ପ୍ରତି ତାଙ୍କର ଦୃଢ଼ ସମର୍ଥନ ଉପରେ ଆଲୋକପାତ କରିଥିଲେ। ପ୍ରଫେସର ମୀନା ଏହି ଭାବନାକୁ ସମର୍ଥନ କରି ସମାଜର ପଛୁଆ ବର୍ଗଉପରେ ଡ. ଆମ୍ବେଦକରଙ୍କ ପରିବର୍ତନକାରୀ ପ୍ରଭାବ ଉପରେ ଆଲୋକପାତ କରିଥିଲେ।ପରେ ପରେ କୁଳପତିଙ୍କ ତତ୍ତ୍ୱାବଧାନରେ ଡ. ଆମ୍ବେଦକରଙ୍କ ଦର୍ଶନ ଓ ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ ଉପରେ ଏକ ବୌଦ୍ଧିକ ଆଲୋଚନା ଚକ୍ର ଅନୁଷ୍ଠିତ ହୋଇଥିଲା। ଏଥିରେ ଅଂଶଗ୍ରହଣକାରୀମାନେ ଡ. ଆମ୍ବେଦକରଙ୍କ ଦୂରଦର୍ଶୀ ଚିନ୍ତାଧାରା ଏବଂ ସମାଜ ପ୍ରତି ସ୍ଥାୟୀ ଅବଦାନ ବିଷୟରେ ସାରଗର୍ଭକ ଆଲୋଚନା କରିଥିଲେ !
