ରାସ୍ତାକଡ଼ରୁ ଝୁଲନ୍ତା ମୃତଦେହ ଜବତ
ନୂଆପଡା (ଓମ ପ୍ରକାଶ ଚୌଧୁରୀ )ନୂଆପଡ଼ା ଜିଲା କୋମନା ବ୍ଲକ ବୁଦ୍ଧିକୋମନା ପଞ୍ଚାୟତର ଡୋଙ୍ଗରିପାଲି ଗାଁରେ ଶୁକ୍ରବାର ଜଣେ ଯୁବକଙ୍କ ଝୁଲନ୍ତା ମୃତଦେହ ଜବତ ହୋଇଛି। ସେ ହେଲେ ବିକାଶ ଶବର (୧୮)। ସୂଚନାକ୍ରମେ ବିକାଶ ତାଙ୍କ ସାଙ୍ଗ ସହ ଗୁରୁବାର ନିକଟସ୍ଥ କ୍ରିଷ୍ଣା ଗାଁକୁ ଏକ ଜନ୍ମଦିନ ଉତ୍ସବରେ ଯୋଗଦେବାକୁ ଯାଇଥିଲେ। ସେଠାରୁ ରାତ୍ରି ୮ଟାରେ ଗାଁକୁ ଫେରିଥିଲେ ମଧ୍ୟ ଘରକୁ ଯାଇ ନ ଥିଲେ। ପାହାନ୍ତିଆରେ ଲୋକେ ସ୍ନାନ, ଶୌଚ ପାଇଁ ନିକଟସ୍ଥ ନଦୀକୁ ଯାଉଥିବା ବେଳେ ଗାଁ ମୁଣ୍ଡ ଏକ ଗଛରେ ବିକାଶଙ୍କ ଝୁଲନ୍ତା ମୃତଦେହ ଦେଖି ତାଙ୍କ ଘରକୁ ପରିବାର ଲୋକେ ଖବର ଦେଇଥିଲେ। ଘଟଣାସ୍ଥଳରେ ପହଞ୍ଝ ଏହା ଦେଖିବା ପରେ କୋମନା ଥାନାରେ ଲିଖିତ ଅଭିଯୋଗ କରିଥିଲେ। ପୋଲିସ ପହଞ୍ଚି ମୃତଦେହ ଜବତ କରିବା ସହ କୋମନା ଡାକ୍ତରଖାନରେ ବ୍ୟବଚ୍ଛେଦ କରାଇ ପରିବାର ଲୋକଙ୍କୁ ହସ୍ତାନ୍ତର କରିଥିଲା। ବିକାଶଙ୍କୁ କେହି ହତ୍ୟାକରି ଆତ୍ମହତ୍ୟାର ରୂପ ଦେବା ପାଇଁ ଗଛରେ ଝୁଲାଇଦେଇଥିବା ପରିବାର ଲୋକେ ସନ୍ଦେହ କରି ଘଟଣାର ବିଧିବଦ୍ଧ ତଦନ୍ତ କରିବାକୁ ଦାବି କରିଛନ୍ତି। ଅନ୍ୟପକ୍ଷରେ ବ୍ୟବଚ୍ଛେଦ ରିପୋର୍ଟ ଆସିବା ପରେ ଘଟଣାର ସତ୍ୟାସତ୍ଯ ଜଣାପଡିବ ବୋଲି ପୋଲିସ କହିଛି।
