ଉତ୍କର୍ଷ ଓଡ଼ିଶା – ମେକ୍ ଇନ୍ ଓଡ଼ିଶା କନ୍ କ୍ଲେଭ୍ ୨୦୨୫: ୧୪୫ଟି ବୁଝାମଣା ପତ୍ର, ୧୨.୮୯ ଲକ୍ଷ କୋଟି ଟଙ୍କାର ନିବେଶ ପ୍ରତିଶ୍ରୁତି, ୮.୯୪ ଲକ୍ଷ ନିଯୁକ୍ତି ସୁଯୋଗ
ଭୁବନେଶ୍ଵର: ଉତ୍କର୍ଷ ଓଡ଼ିଶା- ମେକ୍ ଇନ୍ ଓଡ଼ିଶା କନକ୍ଲେଭ୍ ୨୦୨୫ ଅଭୂତପୂର୍ବ ସଫଳତାର ସହ ଶେଷ ହୋଇଛି । ଏହି କନକ୍ଲେଭ୍ କୁ ଅତ୍ୟନ୍ତ ଉତ୍ସାହଜନକ ପ୍ରତିକ୍ରିୟା ମିଳିଥିବା ବେଳେ ମୋଟ ୧୪୫ଟି ପୁଞ୍ଜିନିବେଶ ସମ୍ବନ୍ଧୀୟ ବୁଝାମଣାପତ୍ର ସ୍ୱାକ୍ଷରିତ ହୋଇଛି , ଯାହା ଓଡ଼ିଶାରେ ପରିବର୍ତ୍ତନକାରୀ ଶିଳ୍ପ ପ୍ରକଳ୍ପ ଏବଂ ଭାଗିଦାରିତା ପାଇଁ ପଥ ପ୍ରଶସ୍ତ କରିଛି । ରାସାୟନିକ ଓ ପେଟ୍ରୋକେମିକାଲ୍ସ, ବୟନଶିଳ୍ପ, ଖଣି ଓ ଧାତୁବିଜ୍ଞାନ, ଅକ୍ଷୟ ଶକ୍ତି, ଆଇଟି/ଆଇଟିଇଏସ୍, ପର୍ଯ୍ୟଟନ ଏବଂ ଖାଦ୍ୟ ପ୍ରକ୍ରିୟାକରଣ ଭଳି ବିଭିନ୍ନ କ୍ଷେତ୍ରରେ ୧୨.୮୯ ଲକ୍ଷ କୋଟି ଟଙ୍କାର ପୁଞ୍ଜିନିବେଶ ହୋଇଛି । ଏହି ପୁଞ୍ଜିନିବେଶ ଦ୍ୱାରା ୮.୯୪ ଲକ୍ଷରୁ ଅଧିକ ନିଯୁକ୍ତି ସୁଯୋଗ ସୃଷ୍ଟି ହେବ, ଯାହା ଏକ ଗୁରୁତ୍ୱପୂର୍ଣ୍ଣ ସାମାଜିକ-ଅର୍ଥନୈତିକ ପ୍ରଭାବ ସୃଷ୍ଟି କରିବ ଏବଂ ସମଗ୍ର ରାଜ୍ୟରେ ସାମଗ୍ରିକ ଅଭିବୃଦ୍ଧିକୁ ସୁନିଶ୍ଚିତ କରିବ ବୋଲି ଆଶା କରାଯାଉଛି । ସ୍ୱାକ୍ଷରିତ ବୁଝାମଣାପତ୍ର ବ୍ୟତୀତ ୪୪୮ ସଂଖ୍ୟକ ୩.୮୪ ଲକ୍ଷ କୋଟି ଟଙ୍କାର ପୁଞ୍ଜିନିବେଶ ଉଦ୍ଦେଶ୍ୟ ଫର୍ମ ପ୍ରାପ୍ତ ହୋଇଛି, ଯେଉଁଥିରେ ୩.୯୨ ଲକ୍ଷ ନିଯୁକ୍ତି ସମ୍ଭାବନା ରହିଛି । ଉତ୍କର୍ଷ ଓଡ଼ିଶା କନକ୍ଲେଭ୍ ଏକ ବଡ଼ ସଫଳତା ହାସଲ କରିଛି, ଯେଉଁଥିରେ ରାଜ୍ୟକୁ ୧୬.୭୩ ଲକ୍ଷ କୋଟି ଟଙ୍କାର ପୁଞ୍ଜିନିବେଶ ସହିତ ମୋଟ ୫୯୩ଟି ପ୍ରକଳ୍ପ ମିଳିଛି ଏବଂ ୨୦ରୁ ଅଧିକ କ୍ଷେତ୍ରରେ ୧୨.୮୮ ଲକ୍ଷ ନିଯୁକ୍ତି ସମ୍ଭାବନା ରହିଛି । କନକ୍ଲେଭର ଉଦଯାପନୀ ଅଧିବେଶନରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଥିଲେ , “ ଉତ୍କର୍ଷ ଓଡ଼ିଶା- ମେକ୍ ଇନ୍ ଓଡ଼ିଶା କନକ୍ଲେଭ୍, ୨୦୨୫” ଶେଷ ହେଉଥିବା ବେଳେ ମୁଁ ଅସୀମ ଖୁସି, ଗର୍ବ ଓ କୃତଜ୍ଞତାର ସହ ଏଠାରେ ଛିଡ଼ା ହୋଇଛି । ମାନ୍ୟବର ପ୍ରଧାନମନ୍ତ୍ରୀଙ୍କ ଦ୍ୱାରା ଗତକାଲି ଉଦ୍ ଘାଟନର ସେହି ଗୁରୁତ୍ୱପୂର୍ଣ୍ଣ କାର୍ଯ୍ୟକ୍ରମଠାରୁ ଆଜି ପର୍ଯ୍ୟନ୍ତ ମୁଁ ବ୍ୟବସାୟ ଜଗତର ସବୁଠାରୁ ଦିପ୍ତିମାନ ବ୍ୟକ୍ତିଙ୍କ ସହ କଥାବାର୍ତ୍ତା କରିବାର ସୁଯୋଗ ପାଇଲି ଏବଂ ମୁଁ ଆଜି ଶାନ୍ତିରେ ଶୋଇପାରିବି, ଯେ ଏହି ଦୁଇ ଦିନରେ ଆମେ ଯେଉଁ ସମୟ ବିନିଯୋଗ କରିଛୁ ତାହା ଭଲ ଭାବରେ ଅତିବାହିତ ହୋଇଛି । ମୁଏହି ପ୍ଲାଟଫର୍ମ ମାଧ୍ୟମରେ ମୁଁ ରାଜ୍ୟରେ ବ୍ୟବସାୟ କରିବା ପାଇଁ ଉତ୍ସାହ, ପ୍ରବଳ ଆଗ୍ରହ ବିଷୟରେ ଜାଣିବାକୁ ପାଇଲି ଏବଂ ଏହା ସହିତ ଆପଣମାନଙ୍କ ମଧ୍ୟରୁ କିଛି ଲୋକ ଉଠାଇଥିବା ଚିନ୍ତା ବିଷୟରେ ଜାଣିବାକୁ ପାଇଲି । ନିଶ୍ଚିତ ଭାବରେ ସରକାର ପ୍ରତ୍ୟେକ ପରାମର୍ଶକୁ ଅନୁଧ୍ୟାନ କରିବେ ଏବଂ ଓଡ଼ିଶାରେ ‘ଇଜ୍ ଅଫ୍ ଡୁଇଂ ବିଜନେସ୍’ ହାସଲ କରିବା ଲକ୍ଷ୍ୟରେ ବ୍ୟବସାୟ ଇକୋ-ସିଷ୍ଟମରେ ଆହୁରି ଉନ୍ନତି ଆଣିବା ଦିଗରେ ପ୍ରତିକାରମୂଳକ ପଦକ୍ଷେପ ନେବେ ବୋଲି ମୁଖ୍ୟମନ୍ତ୍ରୀ କହିଥିଲେ । ଏହି କାର୍ଯ୍ୟକ୍ରମର ସଫଳତା ଉପରେ ଆସ୍ଥା ପ୍ରକଟ କରି ସେ କହିଛନ୍ତି ଯେ, ଏହି କନକ୍ଲେଭ୍ ଏକ ବିଶ୍ୱ ନିବେଶ ସ୍ଥଳ ଭାବେ ଓଡ଼ିଶାର ସ୍ଥିତିକୁ ସୁଦୃଢ଼ କରିଛି । ଏହି ମେଗା କନକ୍ଲେଭରେ ଆମର ସହଯୋଗୀ ଦେଶ ସିଙ୍ଗାପୁର, ମାଲେସିଆ ଓ ଅଷ୍ଟ୍ରେଲିଆ ସମେତ ୧୬ରୁ ଅଧିକ ଦେଶର ପ୍ରତିନିଧିମାନେ ଅଂଶଗ୍ରହଣ କରିଛନ୍ତି ବୋଲି ସୂଚନା ଦେଇ ସେ କହିଥିଲେ ଯେ, ଓଡ଼ିଶା ଦକ୍ଷିଣ-ପୂର୍ବ ଦେଶମାନଙ୍କର ପ୍ରବେଶ ଦ୍ୱାର ହେବାକୁ ଚାହୁଁଛି । ଓଡ଼ିଶାକୁ ରପ୍ତାନିର ବ୍ୟବସାୟିକ କେନ୍ଦ୍ରରେ ପରିଣତ କରିବାକୁ ସେ ସମସ୍ତଙ୍କୁ ଅନୁରୋଧ କରିଥିଲେ ।
ଏହି ସମ୍ମିଳନୀରେ ଅନେକ ବୁଝାମଣାପତ୍ର ସ୍ୱାକ୍ଷରିତ ହୋଇଛି ବୋଲି ଉଲ୍ଲେଖ କରି ସେ କହିଥିଲେ ଯେ, ସରକାର ଏକ ବ୍ୟବସ୍ଥା ସ୍ଥାପନ କରିବେ ଯାହା ଏହି ବୁଝାମଣାପତ୍ର ଏବଂ ଆଗ୍ରହକୁ ବାସ୍ତବରୂପ ଦେବା ପାଇଁ ୨୪ ଘଣ୍ଟା କାର୍ଯ୍ୟ କରିବ । ସେ ଆହୁରି ମଧ୍ୟ କହିଛନ୍ତି, “ମୁଁ ଜାଣିଛି ଯେ ‘କଷ୍ଟ ଆଣ୍ଡ ଟାଇମ୍ ଓଭର ରନ୍’ ଇଣ୍ଡଷ୍ଟ୍ରି ପାଇଁ ଦୁଇଟି ବଡ଼ ଟର୍ଣ୍ଣ ଅଫ୍ । ଆମେ ଏହାର ଯତ୍ନ ନେବୁ ଏବଂ ସୁନିଶ୍ଚିତ କରିବୁ ଯେ ପ୍ରକଳ୍ପଗୁଡ଼ିକୁ କାର୍ଯ୍ୟକ୍ଷମ କରିବାରେ ଯେପରି ଅହେତୁକ ବିଳମ୍ବ ନହୁଏ । ମୁଁ ଆପଣଙ୍କୁ ଆଶ୍ୱାସନା ଦେଇପାରିବି ଯେ ମୋ କାର୍ଯ୍ୟାଳୟ ଆପଣଙ୍କ ପାଇଁ ସବୁବେଳେ ସାଥିରେ ରହିଛି । ଏହା ଦ୍ୱାରା ଆପଣଙ୍କୁ ଆବଶ୍ୟକ ସମସ୍ତ ଜିନିଷ ମିଳିବ । ଯାହା ବି ହେଉ ମୁଁ କେବଳ ଏକ ଫୋନ୍ କଲ୍ ଦୂରରେ ଅଛି । ଏଥିପାଇଁ ଆପଣ ନିଶ୍ଚିତ ରହିପାରିବେ । ଏହା ରାସ୍ତାର ଶେଷ ନୁହେଁ ବୋଲି କହି ସେ କହିଛନ୍ତି ଯେ ଏହି ପ୍ରକ୍ରିୟା ଜାରି ରହିବ ଏବଂ ଯେ କୌଣସି ସମୟରେ ଆପଣ ରାଜ୍ୟରେ ସୁଯୋଗର ଉନ୍ନତି ପାଇଁ କୌଣସି ନୂତନ ଧାରଣାର ପ୍ରସ୍ତାବ ଦେଇପାରିବେ ଏବଂ ଆମେ ସେହି ଚିନ୍ତାଧାରା ପାଇଁ ଦ୍ୱାର ଉନ୍ମୁକ୍ତ ରଖିବୁ । ‘ମୁଁ ଏହାକୁ ଅପେକ୍ଷା କରିଛି’।ସ୍କିଲ୍ଡ ଇନ୍ ଓଡ଼ିଶା, ମହିଳା ଉଦ୍ୟୋଗ ଓ ଷ୍ଟାର୍ଟ ଅପ୍ ଓଡ଼ିଶା ସମ୍ପର୍କିତ ଅଧିବେଶନରୁ ସେ ଉପଯୋଗୀ ସୂଚନା ପାଇଥିଲେ । ଏହି ଅଧିବେଶନଗୁଡ଼ିକ କାର୍ଯ୍ୟକ୍ଷମ ରଣନୀତି ଆଣିଛି ଏବଂ ମୂଲ୍ୟବାନ ଭାଗିଦାରୀକୁ ପ୍ରୋତ୍ସାହିତ କରିଛି ବୋଲି ସେ କହିଛନ୍ତି ।ଏହି ସମ୍ମିଳନୀର ସଫଳତା ନିବେଶକ ଅନୁକୂଳ ପରିବେଶ ଗଠନ ଦିଗରେ ତାଙ୍କ ସରକାରଙ୍କ ପ୍ରତିବଦ୍ଧତାକୁ ପ୍ରତିଫଳିତ କରୁଛି ବୋଲି କହି ଓଡ଼ିଶାର ଶିଳ୍ପ ନୀତି ସଂକଳ୍ପ, ସିଙ୍ଗଲ ୱିଣ୍ଡୋ କ୍ଲିୟରାନ୍ସ ବ୍ୟବସ୍ଥା ଏବଂ ଆମ ରାଜ୍ୟରେ ଶିଳ୍ପଗୁଡ଼ିକ ଯେପରି ସମୃଦ୍ଧ ହୋଇପାରିବ ସେଥିପାଇଁ ‘ବ୍ୟବସାୟ କରିବାର ସହଜତା, ଶୀଘ୍ର କରାଯିବା ଏବଂ ଖର୍ଚ୍ଚ ଉପରେ ଗୁରୁତ୍ୱାରୋପ କରିଥିଲେ ।ଭିତ୍ତିଭୂମି ଏବଂ ନୀତି ବ୍ୟତୀତ ଆମେ ସବୁଜ ଶକ୍ତି, ସର୍କୁଲାର ଅର୍ଥନୀତି ଅଭ୍ୟାସ ଏବଂ ନବୀକରଣଯୋଗ୍ୟ ପ୍ରଯୁକ୍ତିବିଦ୍ୟାକୁ ପ୍ରୋତ୍ସାହନ ଦେଇ ସ୍ଥାୟିତା ଉପରେ ଗୁରୁତ୍ୱ ଦେଉଛୁ । ଅନେକ ଶିଳ୍ପ ଓଡ଼ିଶାରେ ଥିବାରୁ ଖୁସି ବ୍ୟକ୍ତ କରି ସେ ଆହୁରି ମଧ୍ୟ କହିଛନ୍ତି ଯେ ଆଜି ସମସ୍ତେ ନିଜର ଦିଗନ୍ତ ବିସ୍ତାର କରିବାକୁ ପ୍ରତିଶ୍ରୁତିବଦ୍ଧ ହୋଇଛନ୍ତି । ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଜୀଙ୍କ ନେତୃତ୍ୱାଧୀନ ଡବଲ ଇଞ୍ଜିନ ସରକାରର ଏହା ପ୍ରମାଣ ବୋଲି ସେ ଗୁରୁତ୍ୱାରୋପ କରିଥିଲେ । ଭାରତର ଦୃଷ୍ଟିକୋଣ ଉପରେ ଆଲୋକପାତ କରି ସେ କହିଥିଲେ ଯେ ଉଦୀୟମାନ ଶିଳ୍ପଗୁଡ଼ିକର ଚାହିଦା ପୂରଣ କରୁଥିବା ଏକ ଦକ୍ଷ ଶ୍ରମଶକ୍ତି ସୃଷ୍ଟି କରିବା, ବନ୍ଦରଭିତ୍ତିକ ଶିଳ୍ପ କେନ୍ଦ୍ର ସମେତ ବିଶ୍ୱସ୍ତରୀୟ ଭିତ୍ତିଭୂମିର ବିକାଶ, ସ୍ଥାୟୀ ଏବଂ ଅନ୍ତର୍ଭୁକ୍ତ ଅଭିବୃଦ୍ଧି ପାଇଁ ଆମର ବିଶ୍ୱସ୍ତରୀୟ ଭାଗିଦାରୀକୁ ବିସ୍ତାର କରିବା ଏବଂ ତୃଣମୂଳସ୍ତରର ପରିବର୍ତ୍ତନ ପାଇଁ ସ୍ଥାନୀୟ ଉଦ୍ୟୋଗ ଏବଂ ଏମଏସଏମଇ ବିକାଶକୁ ପ୍ରୋତ୍ସାହିତ କରିବା ଉପରେ ଆମର ଧ୍ୟାନ ରହିବ ।ଯୁବ ଉଦ୍ୟୋଗୀଙ୍କ ସଫଳତା ସମ୍ପର୍କରେ ସେ କହିଥିଲେ, ଆଜି ଆମେ ଗର୍ବର ସହ ୪୦ ବର୍ଷରୁ କମ୍ ବୟସର ୬୦ ଜଣ ଯୁବ ଉଦ୍ୟୋଗୀଙ୍କୁ ସ୍ୱୀକୃତି ଦେଉଛୁ, ଯେଉଁମାନଙ୍କର ଅସାଧାରଣ ସ୍ଥିରତା, ସଂକଳ୍ପ ଓ ଉଦ୍ଭାବନ ଓଡ଼ିଶାର ଅର୍ଥନୈତିକ ଅଭିବୃଦ୍ଧିରେ ଉଲ୍ଲେଖନୀୟ ଯୋଗଦାନ ଦେଇଛି । ସେମାନେ ରୋଲ ମଡେଲ ଭାବେ କାମ କରି ଓଡ଼ିଶାର ଯୁବପିଢ଼ିଙ୍କୁ ଉଦ୍ଭାବନ, ରୋଜଗାର ସୃଷ୍ଟି ଏବଂ ଏକ ଚଳ ଚଂଚଳ ଶିଳ୍ପ ଇକୋସିଷ୍ଟମ ନିର୍ମାଣ ପାଇଁ ପ୍ରେରଣା ଦେଉଛନ୍ତି । “ଓଡ଼ିଶା ଭାରତର ପୂର୍ବୋଦୟ ପରିକଳ୍ପନାର ନେତୃତ୍ୱ ନେବାକୁ ପ୍ରସ୍ତୁତ ଏବଂ ମୁଁ ସମସ୍ତ ଅଂଶୀଦାରଙ୍କୁ ଏହି ପରିବର୍ତ୍ତନର ଯାତ୍ରାରେ ଆମ ସହିତ ସାମିଲ ହେବାକୁ ଆମନ୍ତ୍ରଣ କରୁଛି”, ଏହି ଦୃଷ୍ଟିକୋଣକୁ ସମର୍ଥନ କରିବାକୁ ସେ ସମସ୍ତଙ୍କୁ ଆହ୍ୱାନ ଦେଇଥିଲେ ।ପ୍ରଧାନମନ୍ତ୍ରୀ ମୋଦୀଙ୍କ ଦୂରଦୃଷ୍ଟି ସମ୍ପନ୍ନ ଅର୍ଥନୈତିକ ନୀତିକୁ ପ୍ରଶଂସା କରି ସେ କହିଛନ୍ତି ଯେ, ଆପଣମାନେ ସମସ୍ତେ ଜାଣନ୍ତି ଯେ, ଶ୍ରୀ ମୋଦୀଙ୍କ ନେତୃତ୍ୱରେ ଭାରତ ଏକ ଉନ୍ନତ ଭବିଷ୍ୟତ ଦିଗରେ ନୂତନ ଯାତ୍ରା ଆରମ୍ଭ କରିଛି । ଆମେ ବିଶ୍ୱର ପଞ୍ଚମ ବୃହତ୍ତମ ଅର୍ଥନୀତିରେ ପ୍ରବେଶ କରିଛୁ ଏବଂ ଖୁବଶୀଘ୍ର ଆମେ ବିଶ୍ୱର ତୃତୀୟ ବୃହତ୍ତମ ଅର୍ଥନୀତିରେ ପରିଣତ ହେବୁ । ସମର୍ଥନ ପାଇଁ ପ୍ରଧାନମନ୍ତ୍ରୀଙ୍କୁ କୃତଜ୍ଞତା ଜ୍ଞାପନ କରି ସେ କହିଛନ୍ତି, “ମୁଁ, ମୋ ସରକାର ଏବଂ ଓଡ଼ିଶାବାସୀ ମାନ୍ୟବର ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଜୀଙ୍କ ନିକଟରେ ଅତ୍ୟନ୍ତ କୃତଜ୍ଞ, ଯିଏ କି ତାଙ୍କ ଅତ୍ୟନ୍ତ ବ୍ୟସ୍ତବହୁଳ କାର୍ଯ୍ୟକ୍ରମରୁ ସମୟ ବାହାର କରି ଏଠାରେ ଆମ ସହିତ ଯୋଗଦେଲେ, ଯାହାଙ୍କ ଉପସ୍ଥିତି ଏତେ ପ୍ରେରଣାଦାୟକ ଏବଂ ଆତ୍ମବିଶ୍ୱାସ ସୃଷ୍ଟିକାରୀ ପଦକ୍ଷେପ ଭାବରେ କାର୍ଯ୍ୟ କରୁଛି” । ଏହି କାର୍ଯ୍ୟକ୍ରମକୁ ଅର୍ଥପୂର୍ଣ୍ଣ ଓ ସଫଳ କରିବା ପାଇଁ ଅକ୍ଳାନ୍ତ ପରିଶ୍ରମ କରିଥିବା ବିଭାଗ ଏବଂ ଅନ୍ୟ ସମସ୍ତ ଅଂଶୀଦାରଙ୍କୁ ସେ ଧନ୍ୟବାଦ ଜଣାଇଥିଲେ ।
ଉପସ୍ଥିତ ନିବେଶକ ଓ ଶିଳ୍ପପତିମାନଙ୍କ ଉଦ୍ଦେଶ୍ୟରେ ସେ କହିଥିଲେ ଯେ, ଓଡ଼ିଶା ସେମାନଙ୍କୁ ସ୍ୱାଗତ କରିବାକୁ ହାତ ଖୋଲା ରଖି ପ୍ରସ୍ତୁତ ରହିଛି । ଆସନ୍ତୁ ଆମେ ଏହି ପ୍ରତିଶ୍ରୁତିଗୁଡ଼ିକୁ ପରିବର୍ତ୍ତକାରୀ ପ୍ରକଳ୍ପରେ ପରିଣତ କରିବା ପାଇଁ ସହଯୋଗ କରିବା ଯାହା କେବଳ ଓଡ଼ିଶାର ଭବିଷ୍ୟତକୁ ରୂପ ଦେବ ନାହିଁ ବରଂ ଭାରତର ଅଭିବୃଦ୍ଧି କାହାଣୀରେ ମଧ୍ୟ ଯୋଗଦାନ କରିବ ।ସେ ସମସ୍ତଙ୍କୁ ଆହ୍ୱାନ ଦେଇ କହିଛନ୍ତି, ଆସନ୍ତୁ ସମସ୍ତେ ମିଶି ଓଡ଼ିଶାକୁ ଅସୀମ ସୁଯୋଗର ଦେଶରେ ପରିଣତ କରିବା । ଆସନ୍ତୁ ଏକ ସମୃଦ୍ଧ ଓଡ଼ିଶା ନିର୍ମାଣ କରିବା ଯାହା ପ୍ରତ୍ୟେକ ଓଡ଼ିଆଙ୍କ ଆକାଂକ୍ଷାକୁ ପ୍ରତିଫଳିତ କରି ବିକଶିତ ଭାରତ ୨୦୪୭ ପାଇଁ ଯୋଗଦାନ ଦେବ । ଏହା ହେଉଛି ସମୟ, ଏହା ହେଉଛି ଉପଯୁକ୍ତ ସମୟ । ମୁଖ୍ୟମନ୍ତ୍ରୀ ତାଙ୍କ କଥା ଶେଷ କରି କହିଲେ “ସବୁ କିଛି ଭଲ ଭାବରେ ଶେଷ ହୋଇଛି । କିନ୍ତୁ ଏହା ଶେଷ ନୁହେଁ । ଏହି ଦୁଇ ଦିନିଆ କାର୍ଯ୍ୟକ୍ରମର ଅନ୍ତ ଘଟିଛି, କିନ୍ତୁ ବାସ୍ତବରେ ଏହା ଏକ ନୂତନ ଯାତ୍ରାର ଆରମ୍ଭ, ଆଶା, ସମୃଦ୍ଧି ଏବଂ ରାଜ୍ୟ ତଥା ରାଜ୍ୟବାସୀଙ୍କ କଲ୍ୟାଣର ଯାତ୍ରା ହୋଇଛି ।
ଉଦଯାପନୀ ଅଧିବେଶନରେ ଅନ୍ୟମାନଙ୍କ ମଧ୍ୟରେ ଉପମୁଖ୍ୟମନ୍ତ୍ରୀ ଶ୍ରୀ କନକ ବର୍ଦ୍ଧନ ସିଂହଦେଓ, ଉପମୁଖ୍ୟମନ୍ତ୍ରୀ ଶ୍ରୀମତୀ ପ୍ରଭାତୀ ପରିଡ଼ା, ଶିଳ୍ପ, ଦକ୍ଷତା ବିକାଶ ଓ ବୈଷୟିକ ଶିକ୍ଷା ମନ୍ତ୍ରୀ ସମ୍ପଦ ଚନ୍ଦ୍ର ସ୍ୱାଇଁ, ଶିଳ୍ପ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀ ହେମନ୍ତ ଶର୍ମା ପ୍ରମୁଖ ବକ୍ତବ୍ୟ ରଖିଥିଲେ ।
