*ବଣ ପାହାଡ଼ ଘେରା ଜନଜାତି ବହୁଳ ମାଲକାନଗିରି ଜିଲ୍ଲାର ବିଦ୍ୟୁତ ଭିତ୍ତିଭୂମିକୁ ସୁଦୃଢ଼ କରିଛି ଟିପିଏସ୍ଓଡିଏଲ୍*-
ମାଲକାନଗିରି ଜିଲ୍ଲାର ବିଦ୍ୟୁତ ଭିତ୍ତିଭୂମିର ବିକାଶ – ସବଷ୍ଟେସନର ଉନ୍ନତୀକରଣ ସହ ନିରବଚ୍ଛିନ୍ନ ବିଜୁଳି ଯୋଗାଣ – ବାଲିମେଳା ଓ ମାଥିଲିଠାରେ ଟ୍ରାନ୍ସଫର୍ମରର କ୍ଷମତାକୁ ଉନ୍ନତୀକରଣ – ବିଦ୍ୟୁତ ଫିଡରଗୁଡ଼ିକର ସୁଦୃଢ଼ୀକରଣ – ଜନଜାତିଙ୍କ ଦୈନନ୍ଦିନ ଜୀବନରେ ସୁନିଶ୍ଚିତ ବିଦ୍ୟୁତ ସେବା ବ୍ରହ୍ମପୁର, ଅଗଷ୍ଟ ୨୦୨୫: ଟିପି ସଦର୍ଣ୍ଣ ଓଡ଼ିଶା ଡିଷ୍ଟ୍ରିବ୍ୟୁସନ ଲିମିଟେଡ (ଟିପିଏସ୍ଓଡିଏଲ୍) ତରଫରୁ ମାଲକାନଗିରି ଜିଲ୍ଲାରେ ବିଦ୍ୟୁତ ଭିତ୍ତିଭୂମିକୁ ସୁଦୃଢ଼ କରିବା ପାଇଁ ନିଆଯାଇଛି ବହୁ ଅଭିନବ ପଦକ୍ଷେପ। ଦୁର୍ଗମ ତଥା ଜନଜାତି ବହୁଳ ଏହି ବଣ ପାହାଡ଼ ଘେରା ମୁଲକରେ ଭରସାଯୋଗ୍ୟ ଓ ଗୁଣାତ୍ମକ ବିଜୁଳି ପହଞ୍ଚାଇବା ପାଇଁ କମ୍ପାନୀ ପକ୍ଷରୁ ପ୍ରୟାସ କରାଯାଇଛି। ଯାହାଦ୍ୱାରା ଗତ କିଛି ମାସ ମଧ୍ୟରେ କାର୍ଯ୍ୟକାରୀ ହୋଇଥିବା ପଦକ୍ଷେପ ଯୋଗୁଁ ବାରମ୍ବାର ବିଦ୍ୟୁତ ସେବା ବିଚ୍ଛିନ୍ନ ହେବା ଭଳି ସମସ୍ଯାକୁ ଦୂର କରାଯାଇପାରିଛି। ଏଥିସହିତ ଗ୍ରାମୀଣ ପରିବାରଗୁଡ଼ିକରେ ବିଦ୍ୟୁତ ସେବାକୁ ସୁଦୃଢ଼ କରାଯିବା ସହିତ ଜିଲ୍ଲାରେ ଗୁରୁତ୍ୱପୂର୍ଣ୍ଣ ସେବା ଉପରେ ଗୁରୁତ୍ୱ ଦିଆଯାଇଛି। ଭୌଗୋଳିକ ଦୃଷ୍ଟିକୋଣରୁ ମାଲକାନଗିରି ଜିଲ୍ଲାର ଅବସ୍ଥିତି ଏବଂ ବିକ୍ଷିପ୍ତ ଜନସଂଖ୍ୟାଯୋଗୁଁ ଏଠାରେ ପରିଚାଳନା କରିବା କଷ୍ଟସାଧ୍ୟ ଅଟେ। ମାତ୍ର ଏହି ସମସ୍ୟାର ସମାଧାନ ପାଇଁ ଟିପିଏସ୍ଓଡିଏଲ୍ ତରଫରୁ ଏଠାକାର ସବଷ୍ଟେସନ, ଫିଡର ଏବଂ ଡିଷ୍ଟ୍ରିବ୍ୟୁସନ ଲାଇନରେ ସୁଧାର ଆଣିବା ପାଇଁ ବହୁ ପଦକ୍ଷେପ ନିଆଯିବା ସହିତ ଉନ୍ନତୀକରଣ କରାଯାଇଛି। କେ.ଗୁମ୍ମା ସବଷ୍ଟେସନରେ, ଏକକ ଟ୍ରାନ୍ସଫର୍ମର ଉପରେ ଥିବା ନିର୍ଭରତା ସମ୍ବନ୍ଧୀୟ ବିପଦକୁ ହ୍ରାସ କରିବା ପାଇଁ ଅତିରିକ୍ତ ବ୍ୟବସ୍ଥା କରାଯାଇଛି। ଏହି ପଦକ୍ଷେପ ଯୋଗୁଁ ବାରମ୍ବାର ବିଦ୍ୟୁତ ସେବା ବାଧାପ୍ରାପ୍ତ ହେବାଭଳି ସମସ୍ୟା ଦୂର ହେବା ସହିତ ସ୍ଥାନୀୟ ଅଞ୍ଚଳରେ ନିରବଚ୍ଛିନ୍ନ ବିଦ୍ୟୁତ ସେବା ଯୋଗାଣକୁ ସୁନିଶ୍ଚିତ କରାଯାଇପାରିଛି। ସେହିପରି ବାଲିମେଳା ଓ ମାଥିଲିଠାରେ ଟ୍ରାନ୍ସଫର୍ମରର କ୍ଷମତାକୁ ୫ଏମଭିଏକୁ ବୃଦ୍ଧି କରାଯାଇଛି। ଯାହାଦ୍ୱାରା ସମ୍ପୃକ୍ତ ଅଞ୍ଚଳର ବିଦ୍ୟୁତ ଭିତ୍ତିଭୂମି ସୁଦୃଢ଼ ହେବା ସହିତ ଗ୍ରାହକଙ୍କ ବର୍ଦ୍ଧିତ ବିଜୁଳି ଚାହିଦାକୁ ପୂରା କରାଯାଇପାରିଛି। ଜିଲ୍ଲାରେ ୩୩କେଭି ଲାଇନର ମଧ୍ୟ ସୁଦୃଢ଼ୀକରଣ କରାଯାଇଛି। ଫିଡରଗୁଡ଼ିକର ସୁଦୃଢ଼ୀକରଣ କରାଯିବା ସହିତ ସଂଯୋଗୀକରଣକୁ ଅଧିକ ଗୁରୁତ୍ବ ଦିଆଯାଇଛି। ଖୈରପୁଟ ସ୍କୁଲକୁ ଏକ ନିର୍ଦ୍ଧିଷ୍ଟ ଲାଇନ ସହ ସଂଯୋଗ କରାଯାଇଥିବାବେଳେ ଚିତ୍ରକୋଣ୍ଡା ଜଳଭଣ୍ଡାର ଓ ଏହାର ଆଖପାଖ ଅଞ୍ଚଳରେ ବିଦ୍ୟୁତ ସେବାକୁ ସୁଦୃଢ଼ କରାଯାଇଛି। ସେହିପରି ଜିଲ୍ଲାର ୧୧କେଭି ଲାଇନର ବିସ୍ତାର କରାଯିବା ସହିତ କେ.ଗୁମ୍ମା, ଚିତ୍ରକୋଣ୍ଡା, ପାଣ୍ଡ୍ରିପାନି, ବଜରଙ୍ଗ କଲୋନୀ ଏବଂ ବନ୍ଦୀଗୁଡ଼ା ଆଦି ଅଞ୍ଚଳରେ ବିଦ୍ୟୁତ ଭିତ୍ତିଭୂମିକୁ ସୁଦୃଢ କରଯାଇପାରିଛି। ବ୍ରେକଡାଉନ ସମୟରେ ବିଦ୍ୟୁତ ସେବାକୁ ପୁର୍ନସ୍ଥାପନ କରିବା ଓ ପ୍ରାକୃତିକ ବିପର୍ଯ୍ୟୟ ସମୟରେ ବିଦ୍ୟୁତ ସେବାକୁ ଶୀଘ୍ର ସ୍ଥାପନ କରିବା କ୍ଷେତ୍ରରେ ଏହି ପଦକ୍ଷେପ ବିଶେଷ ଭାବରେ ସହାୟକ ହେବ। ଭରସାଯୋଗ୍ୟ ଓ ଗୁଣାତ୍ମକ ବିଜୁଳି ସେବା ଏହି ଅଞ୍ଚଳରେ ବସବାସ କରୁଥିବା ପରିବାରଗୁଡ଼ିକ ପାଇଁ ଏକ ବିଶେଷ ସୁବିଧା ଭାବରେ ଉଭା ହୋଇଛି। ସ୍କୁଲ ଓ ହଷ୍ଟେଲଗୁଡ଼ିକ ନିରବଚ୍ଛିନ୍ନ ବିଦ୍ୟୁତ ସେବା ଯୋଗୁଁ ଠିକ୍ ଭାବରେ ପରିଚାଳିତ ହେବା, ଅଙ୍ଗନବାଡ଼ି ଓ ସ୍ୱାସ୍ଥ୍ୟକେନ୍ଦ୍ର ବିନା କୌଣସି ବାଧାରେ କାର୍ଯ୍ଯ କରିବା ସହିତ କୃଷି ତଥା ପମ୍ପରେ ଜଳ ଉଠାଣ ଆଦି କାର୍ଯ୍ୟ ସୁରୁଖୁରୁରେ ହୋଇ ପାରୁଛି। ବିଦ୍ୟୁତ ସେବା କ୍ଷେତ୍ରରେ ସ୍ଥିରତା ଓ ଗୁଣାତ୍ମକ ବିଜୁଳି ଯୋଗାଣ ଯୋଗୁଁ କ୍ଷୁଦ୍ର ବ୍ୟବସାୟଗୁଡ଼ିକ ମଧ୍ୟ ଆର୍ଥିକ ସ୍ତରରେ ଉପକୃତ ହୋଇପାରୁଛି। ମାଲକାନଗିରି ଜିଲ୍ଲାରେ ବସବାସ କରୁଥିବା କୋୟା, ଭୂମିଆ, ପରଜା, ବଣ୍ଡା ଏବଂ ଦିଦାୟୀ ଆଦି ଜନଜାତିଙ୍କ ଦୈନନ୍ଦିନ ଜୀବନରେ ଏହି ଉନ୍ନତୀକରଣ ବିଶେଷ ଭାବରେ ସହାୟକ ହୋଇପାରିଛି। ଶିକ୍ଷା, ସ୍ୱାସ୍ଥ୍ୟ, ସାମାଜିକ କଲ୍ୟାଣ ଯୋଜନା ଓ ଆୟ ସୃଷ୍ଟି କରିବାରେ ଏହି ଅଞ୍ଚଳର ଉନ୍ନତ ବିଦ୍ୟୁତ ସେବା ଏକ ଗୁରୁତ୍ବପୂର୍ଣ୍ଣ ଭୂମିକା ନିର୍ବାହ କରିଛି। ବିଦ୍ୟୁତ ଗ୍ରୀଡଗୁଡ଼ିକର ଉନ୍ନତିକରଣ କରାଯିବା ସହିତ ଏସବୁକୁ ସୁଦୃଢ଼ କରିବା ଦ୍ୱାରା ଟିପିଏସ୍ଓଡିଏଲ୍ ଏହି ସମୁଦାୟସବୁକୁ ରାଜ୍ୟର ବିକାଶ ପଥରେ ସାମିଲ କରି ପାରିଛି। ମାଲକାନଗିରି ଜିଲ୍ଲାର ଏହି ଉନ୍ନତୀକରଣ ବାବଦରେ ଟିପିଏସ୍ଓଡିଏଲର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଶ୍ରୀ ଅମିତ କୁମାର ଗର୍ଗ କହିଛନ୍ତି, “ଭୌଗୋଳିକ ଦୃଷ୍ଟିକୋଣରୁ ମାଲକାନଗିରି ଜିଲ୍ଲାରେ ବିଦ୍ୟୁତ ସେବା ପରିଚାଳନା କରିବା ଏକ ଆହ୍ୱାନ ଅଟେ। ମାତ୍ର ଟିପିଏସ୍ଓଡିଏଲ୍ ତରଫରୁ ନିଆଯାଇଥିବା ଉଲ୍ଲେଖନୀୟ ପଦକ୍ଷେପ ଯୋଗୁଁ ଭରସାଯୋଗ୍ୟ ନେଟୱର୍କ ଓ ବିଦ୍ୟୁତ ଭିତ୍ତିଭୂମିକୁ ସୁଦୃଢ଼ କରାଯାଇପାରିଛି। ଯାହାଦ୍ୱାରା ଏହି ଅଞ୍ଚଳର ଶିକ୍ଷା, ସ୍ୱାସ୍ଥ୍ୟସେବା, ଜୀବିକା ଓ ସମୁଦାୟର ବିକାଶକୁ ଗୁରୁତ୍ୱ ଦିଆଯାଇଛି। ଏହି ଅଞ୍ଚଳରେ ଭରସାଯୋଗ୍ୟ ବିଦ୍ୟୁତ ସେବା ଯୋଗାଇବା କେବଳ ବିଦ୍ୟୁତ ସେବା କ୍ଷେତ୍ରରେ ସୀମିତ ନୁହେଁ ବରଂ ଲୋକଙ୍କୁ ସଶକ୍ତ କରିବା ଓ ସେମାନଙ୍କ ବିକାଶକୁ ପ୍ରୋତ୍ସାହନ ଦେବା ପାଇଁ ଉଦ୍ଦିଷ୍ଟ”।ଟିପିଏସ୍ଓଡିଏଲ୍ ତରଫରୁ ସମଗ୍ର ଦକ୍ଷିଣ ଓଡ଼ିଶାରେ ସୁରକ୍ଷିତ, ନିର୍ଭରଯୋଗ୍ୟ ଓ ଗୁଣାତ୍ମକ ବିଜୁଳି ଯୋଗାଣର ଏକ ବିଶେଷ ଦୃଷ୍ଟାନ୍ତ ହେଉଛି ବିଦ୍ୟୁତ ସେବା କ୍ଷେତ୍ରରେ ମାଲକାନଗିରି ଜିଲ୍ଲାର ଏହି ଉନ୍ନତୀକରଣ। ଓଡ଼ିଶା ସରକାର ଓ ଟାଟା ପାୱାରର ଏହି ଯୌଥ ଉଦ୍ୟୋଗ ତଥା ଟିପିଏସ୍ଓଡିଏଲ୍ ବିଦ୍ୟୁତ ଭିତ୍ତିଭୂମିକୁ ସୁଦୃଢ଼ କରିବା, ନେଟୱର୍କର ଉନ୍ନତୀକରଣ କରିବା, ଯୋଗାଣ ବ୍ୟବସ୍ଥାରେ ଉନ୍ନତି ଆଣିବା, ଗ୍ରାହକଙ୍କୁ ଗୁଣାତ୍ମକ ଓ ଭରସାଯୋଗ୍ୟ ବିଦ୍ୟୁତ ସେବା ଯୋଗାଇବା କ୍ଷେତ୍ରରେ ନିବେଶ ଓ ପ୍ରୟାସ ଜାରି ରଖିଛି। ସ୍ଥାୟୀ ଓ ସମାବେଶୀ ବିକାଶକୁ ଗୁରୁତ୍ୱ ଦେଇ ଟିପିଏସ୍ଓଡିଏଲ୍ ବିଦ୍ୟୁତ ସେବାକୁ ଆହୁରି ବ୍ୟାପକ କରିବା ପାଇଁ ପ୍ରତିବଦ୍ଧ ଅଟେ।