ଆର. ଉଦୟଗିରି (ମନୋଜ କୁମାର ପାଢୀ): ଗଜପତିରେ ଛେଳି ଚରାଇବାକୁ ଯାଇଥିବା ଜଣେ ବ୍ୟକ୍ତିଙ୍କ ସନ୍ଦେହଜନକ ମୃତ୍ୟୁ ଘଟିଥିବା ସୂଚନା ମିଳିଛି. ମୃତ୍ୟୁ କେମିତି ଓ କେତେବେଳେ ଆସିବ ତାହା କାହାକୁ ଜଣା ନଥାଏ । ଘରୁ ଯାଇଥିଲେ ଛେଳି ଚରାଇବାକୁ କିନ୍ତୁ ଶବ ହୋଇ ଘରକୁ ଫେରିଲେ । ଏମିତି ଏକ ଅଭାବନୀୟ ଘଟଣା ଘଟିଛି ଗଜପତି ଜିଲା ରାମଗିରି ଥାନା ଅମେଡା ପଞ୍ଚାଯତ ରାଇଗୁମା ଗ୍ରାମରେ । ମୃତ ବ୍ୟକ୍ତି ଜଣକ ହେଲେ ଯଦୁମଣି ଦଣ୍ଡସେନା (୫୨) ।
ଯଦୁମଣି ସବୁଦିନ ଭଳି ସକାଳୁ ଉଠି ନିତ୍ୟକର୍ମ ସାରି ଛେଳିଗୋଠ ଧରି ଗାଁ ନିକଟରେ ଥିବା ଜଙ୍ଗଲକୁ ଚରାଇବାକୁ ଯାଇଥିଲେ । ଅପରାହ୍ନରେ କୌଣସି କାରଣରୁ ଯଦୁମଣି ଜଙ୍ଗଲରେ ଆଚେତ ଅବସ୍ଥାରେ ପଡିରହିଥିବା ସ୍ଥାନୀୟ କିଛି ଲୋକ ଦେଖ୍ ତାଙ୍କୁ ଘରକୁ ଆଣିଥିଲେ । ପରେ ଅଟୋ ଯୋଗେ ରାମଗିରି ପ୍ରାଥମିକ ସ୍ବାସ୍ଥ୍ୟକେନ୍ଦ୍ରକୁ ଅଣାଯାଇଥିଲା କିନ୍ତୁସେଠାକାର ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ମୃତ୍ୟୁର କାରଣ ଅସ୍ପଷ୍ଟ ରହିଛି । ଏ ବାବଦରେ ରାମଗିରି ଥାନାରେ କେସ ଅପମୃତ୍ଯୁ ମାମଲା ରୁଜୁ କରାଯାଇ ଶବ ବ୍ୟବଛେଦ ପାଇଁପାରଳାଖେମୁଣ୍ଡି ମୁଖ୍ୟ ଚିକିତ୍ସାଳୟକୁ ପଠାଯାଇଥିବା ରାମଗିରି ଥାନା ଅଧୂକାରୀ ଗଜପତି ଦୋରା ସୂଚନା ଦେଇଛନ୍ତି । ଶବ ବ୍ୟବଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି ।
