ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟରେ ୪୮୦ କୋଟି ଟଙ୍କା ବ୍ୟୟଅଟକଳରେ କ୍ୟାମ୍ପସ ଉନ୍ନୟନ ପ୍ରକଳ୍ପର ଶୁଭାରମ୍ଭ
କୋରାପୁଟ:ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ (ସିୟୁଓ)ର ମୁଖ୍ୟ କ୍ୟାମ୍ପସରେ ଭିତ୍ତିଭୂମି ବିକାଶ ପାଇଁ ବିଭିନ ପ୍ରକଳ୍ପ ର ନିର୍ମାଣ ନିମନ୍ତେ ଭାରତ ସରକାରଙ୍କ ଅଧୀନରେ ଥିବା ଏନବିସିସି (ଇଣ୍ଡିଆ) ଲିମିଟେଡକୁ ପ୍ରୋଜେକ୍ଟ ମ୍ୟାନେଜମେଣ୍ଟ କନସଲଟାନ୍ସି (ପିଏମସି) ଦାୟିତ୍ବ ପ୍ରଦାନ କରିଛି । ୪୮୦ କୋଟି ଟଙ୍କା ବ୍ୟୟଅଟକଳରେ ନିର୍ମିତ ଏହି ପ୍ରକଳ୍ପ ଓଡ଼ିଶାରେ ପ୍ରଥମ ଥର ପାଇଁ ହେବାକୁ ଯାଉଛି ।ଏହି ପ୍ରକଳ୍ପରେ ଏକାଡେମିକ୍ ବ୍ଲକ, ହଷ୍ଟେଲ, ସ୍ପୋର୍ଟସ କମ୍ପ୍ଲେକ୍ସ, କାଫେଟେରିଆ, ୧୨୦୦ ସିଟ୍ ବିଶିଷ୍ଟ ଅଡିଟୋରିୟମ, ସପିଂ କମ୍ପ୍ଲେକ୍ସ, ସ୍ୱାସ୍ଥ୍ୟ କେନ୍ଦ୍ର ଏବଂ ଅନ୍ତର୍ଜାତୀୟ ଗେଷ୍ଟ ହାଉସ୍ ସମେତ ଅତ୍ୟାଧୁନିକ ସୁବିଧାର ପରିକଳ୍ପନା କରାଯାଇଛି, ଯାହା ୨୦୨୭ ପାଇଁ ସମ୍ପୂର୍ଣ୍ଣ କରିବାକୁ ଲକ୍ଷ୍ୟ ରଖାଯାଇଛି – ସିୟୁଓର ବିକାଶଯାତ୍ରାରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ।ବହୁ ଦିନ ଧରି ଅଟକିଥିବା ବିଶ୍ବବିଦ୍ୟାଳୟର ଏହି ବ୍ୟାପକ ବିକାଶ ପାଇଁ ଶିକ୍ଷା ମନ୍ତ୍ରଣାଳୟ ଆବଶ୍ୟକ ପାଣ୍ଠି ଆବଣ୍ଟନ କରିଛନ୍ତି । ମନ୍ତ୍ରଣାଳୟର ଅତୁଟ ସମର୍ଥନ ଏବଂ ସିୟୁଓ କୁଳପତି ପ୍ରଫେସର ଚକ୍ରଧର ତ୍ରିପାଠୀଙ୍କ ନିରନ୍ତର ଉଦ୍ୟମ ଯୋଗୁଁ ଏହି ସଫଳତା ସମ୍ଭବ ହୋଇପାରିଛି।ବିଭିନ ପ୍ରକଳ୍ପ ନିର୍ମାଣ ନିମନ୍ତେ କୁଳପତି ପ୍ରଫେସର ଚକ୍ରଧର ତ୍ରିପାଠୀଙ୍କ ଉପସ୍ଥିତିରେ ୨୦୨୫ ଜାନୁଆରୀ ୩ ତାରିଖରେ ପିଏମସି ପାଇଁ ଆନୁଷ୍ଠାନିକ ଚୁକ୍ତିନାମା ସ୍ୱାକ୍ଷରିତ ହୋଇଥିଲା । ସିୟୁଓ ପକ୍ଷରୁ ରେଜିଷ୍ଟ୍ରାର ପ୍ରଫେସର ଏନ୍ ସି ପଣ୍ଡା (ଆଇ/ସି); ଅଶୋକ କୁମାର ସାହୁ, ଫାଇନାନ୍ସ ଅଫିସର (ଆଇ/ସି); ଏବଂ ଶ୍ରୀରାମ ପାଢୀ, କାର୍ଯ୍ୟନିର୍ବାହୀ ଯନ୍ତ୍ରୀ, ଓ ଏନବିସିସି ତରଫରୁ ବରିଷ୍ଠ ମହାପ୍ରବନ୍ଧକ ଆର ଏନ ସିହ୍ନା ଚୁକ୍ତିନାମାରେ ସ୍ୱାକ୍ଷର କରିଛନ୍ତି ବୋଲି ବିଶ୍ବବିଦ୍ୟାଳୟର ଲୋକସମ୍ପର୍କ ଅଧିକାରୀ ଡ. ଫଗୁନାଥ ଭୋଇ ସୂଚନା ଦେଇଛନ୍ତି ।
